തിരുവനന്തപുരം: സംസ്ഥാനത്തെ ജനങ്ങളുടെ താത്പര്യം സംരക്ഷിക്കുന്ന മുഖ്യമന്ത്രിയാണോ അല്ലയോ എന്നുള്ളത് കേന്ദ്രമന്ത്രി പിയൂഷ് ഗോയലല്ല തീരുമാനിക്കേണ്ടതെന്നും, സംസ്ഥാനത്തെ ജനങ്ങള് ആണെന്നും മുഖ്യമന്ത്രി പിണറായി വിജയന്. സ്വന്തം നാട്ടുകാരെ കുറിച്ച് ചിന്തയില്ലാതെ മുഖ്യമന്ത്രിമാര് ഇങ്ങനെ പ്രവര്ത്തിച്ചാല് എന്താകുമെന്ന പിയൂഷ് ഗോയലിന്റെ ചോദ്യത്തോട് പ്രതികരിക്കുകയായിരുന്നു മുഖ്യമന്ത്രി.
മുംബൈയില്നിന്ന് കേരളത്തിലേക്ക് ട്രെയിനയയ്ക്കാന് റെയില്വേ കഴിഞ്ഞ ദിവസം തീരുമാനിച്ചു. എന്നാല് ഇതുസംബന്ധിച്ചു കേരളത്തിനു വിവരം ലഭിച്ചിരുന്നില്ല. ഇക്കാര്യം റെയില്വേ മന്ത്രിയെ അറിയിച്ചു. എന്നാലതിനുശേഷവും സമാനമായ തീരുമാനമുണ്ടായി. അതിനാല് ഇക്കാര്യം പ്രധാനമന്ത്രിയെ കൂടി അറിയിച്ചു. നമ്മുടെ കരുതലിനെ അട്ടിമറിക്കുന്ന പ്രശ്നമാണിത്. മുംബൈയില് നിന്നുള്ളവരും വരണമെന്നാണ് സര്ക്കാരിന്റെ നിലപാട്. എന്നാല്, രോഗം പടരാതിരിക്കാനുള്ള നിബന്ധനകള് കര്ശനമായി നടപ്പിലാക്കണമെന്നും മുഖ്യമന്ത്രി പറഞ്ഞു.
കേരളത്തിലേക്ക് വരുന്നവര് രജിസ്റ്റര് ചെയ്യണമെന്ന് മാത്രമാണ് പിയൂഷ് ഗോയലിനോട് പറഞ്ഞത്. രജിസ്റ്റര് ചെയ്താല് മാത്രമേ ഇവിടുത്തെ കാര്യങ്ങള് ചെയ്യാനാകൂ. റെയില്വേ മന്ത്രിയെന്ന നിലയില് അദ്ദേഹത്തിനും ഇക്കാര്യത്തില് ഉത്തരവാദിത്വമുണ്ട്. കത്തു ലഭിച്ചശേഷവും വീണ്ടും ട്രെയിനയയ്ക്കാന് ശ്രമിച്ചത് രാഷ്ട്രീയം നോക്കിയുള്ള നടപടിയാണ്. ഉദ്യോഗസ്ഥര് ഇടപെട്ടാണ് അതു തടഞ്ഞത്. അതുകൊണ്ടാണ് പ്രധാനമന്ത്രിയെ ഈ ചെറിയ കാര്യം അറിയിക്കേണ്ടി വന്നതെന്നും മുഖ്യമന്ത്രി ചൂണ്ടിക്കാട്ടി.
പിയൂഷ് ഗോയല് പറഞ്ഞത് നിര്ഭാഗ്യകരമായി പോയി. അത് ആ പദവിക്ക് ചേര്ന്നതല്ല. നമ്മുടെ രാജ്യം നേരിടുന്ന പ്രശ്നങ്ങളുടെ ഗൗരവത്തിന്റെ നേരിയ അംശം പോലും അദ്ദേഹത്തിന് ഉള്ക്കൊള്ളാന് കഴിഞ്ഞില്ലെന്നുള്ളത് നിര്ഭാഗ്യകരമാണെന്നും അദ്ദേഹം കൂട്ടിച്ചേര്ത്തു.
