പരിസ്ഥിതിലോല മേഖല സംബന്ധിച്ച് നടത്തിയ ഉപഗ്രഹ സർവേയിൽ എരുമേലി പഞ്ചായത്തിലെ 2 വാർഡുകൾ വനഭൂമിയിൽ ഉൾപ്പെട്ടതായി ആരോപണം.
11–ാം വാർഡ് ആയ പമ്പാവാലി. 12–ാം വാർഡ് എയ്ഞ്ചൽവാലി എന്നിവയാണ് വനഭൂമിയാണെന്നു സർവേ റിപ്പോർട്ടിൽ കാണിക്കുന്നതെന്ന് പഞ്ചായത്ത് അംഗങ്ങളായ മറിയാമ്മ സണ്ണി, മാത്യു ജോസഫ് എന്നിവർ ആരോപിച്ചു. ഇതിന് എതിരെ ശക്തമായ സമര പരിപാടികൾ ആരംഭിക്കുമെന്നും പഞ്ചായത്ത് അംഗങ്ങൾ അറിയിച്ചു.
പെരിയാർ ടൈഗർ റിസർവിനോട് ഒരു കിലോ മീറ്റർ പരിധിയിലുള്ള 2 വാർഡുകളാണ് പമ്പാവാലിയും എയ്ഞ്ചൽ വാലിയും. ഈ വാർഡുകളിൽ ബഫർ സോൺ പരിധിയിലായതിനെത്തുടർന്നു ജനങ്ങളും ജനപ്രതിനിധികളും ഏറെനാളായി ശക്തമായി പ്രതിഷേധം തുടരുകയാണ്.
വനപരിധി നിർണയിക്കുന്നതിലെ അപാകതയും വനംവകുപ്പിന്റെ തെറ്റായ റിപ്പോർട്ടും ആണ് ഈ വാർഡുകൾ ബഫർ സോൺ പരിധിയിലാകാൻ കാരണമെന്നാണ് ആരോപണം.
എന്നാൽ, ഇപ്പോൾ ഉപഗ്രഹ സർവേ പ്രകാരം ഈ വാർഡുകൾ വനഭൂമി തന്നെയാണെന്ന വിധത്തിലാണു റിപ്പോർട്ട് വന്നിട്ടുള്ളത്. ഈ സർവേ തെറ്റാണെന്നാണ് ജനങ്ങളുടെയും ജനപ്രതിനിധകളുടെയും നിലപാട്.
ഇരു വാർഡുകളിലും ആയിരത്തിൽ അധികം വീടുകളും 4000 ജനസംഖ്യയും ഉണ്ട്. 8 കിലോമീറ്റർ പൊതുമരാമത്ത് റോഡുകൾ, സ്കൂൾ, പഞ്ചായത്ത് സാംസ്കാരിക നിലയം, അങ്കണവാടികൾ എന്നിവയും ഈ വാർഡുകളിൽ പ്രവർത്തിക്കുന്നുണ്ട്.
ഈ സാഹചര്യത്തിലാണ് ഈ വാർഡുകൾ വനഭൂമി എന്ന വിധത്തിൽ തെറ്റായ സർവേ റിപ്പോർട്ട് പുറത്തുവന്നതെന്നും ആരോപിക്കുന്നു. ബഫർസോൺ പ്രശ്നത്തിന് എതിരെ ഇൻഫാമിന്റെ നേതൃത്വത്തിലും കോൺഗ്രസ് പാർട്ടിയുടെ നേതൃത്വത്തിലും ഒട്ടേറെ സമരങ്ങളാണു മേഖലയിൽ നടന്നിട്ടുള്ളത്.
