കോട്ടയം: കോട്ടയം ജില്ലയില് പലയിടങ്ങളിലും ഇന്നലെ പെയ്ത കനത്ത മഴയിലും കാറ്റിലും നാശനഷ്ടം ഉണ്ടായി. ഈരാറ്റുപേട്ട ഉൾപ്പെടെയുള്ള ഭാഗങ്ങളിൽ മരങ്ങള് കടപുഴകി.
ഇടിമിന്നലില് വൈദ്യുതി ബന്ധം തകര്ന്നു. ഉച്ച കഴിഞ്ഞു 2.30 ഓടെയാണ് കനത്ത മഴ എത്തിയത്. ഈരാറ്റുപേട്ട പാല റോഡില് കാറിനും സ്കൂട്ടറിനും മുകളിലേക്കാണ് മരം ഒടിഞ്ഞുവീണത്. സംഭവത്തില് ആളപായമില്ല.
അതേസമയം, 24 മണിക്കൂറിനുള്ളില് ആന്ഡമാന് നിക്കോബാര് ദ്വീപില് കാലവര്ഷം എത്തുമെന്നാണ് കാലാവസ്ഥ വകുപ്പിന്റെ നിഗമനം. കേരളത്തില് അടുത്ത അഞ്ചു ദിവസം ഇടിമിന്നലോടു കൂടിയ ഒറ്റപ്പെട്ട മഴയ്ക്ക് സാധ്യതയുണ്ട്.
മഴയ്ക്കൊപ്പം ശക്തമായ കാറ്റും വീശിയേക്കും. അടുത്ത 24 മണിക്കൂറിനുള്ളില് കാലവര്ഷം നിക്കോബര് ദ്വീപ് സമൂഹം, തെക്കന് ആന്ഡമാന് കടല്, തെക്കന് ബംഗാള് ഉള്ക്കടല് എന്നിവിടങ്ങളില് എത്തിച്ചേരാന് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ അറിയിപ്പ്. ജൂണ് നാലിന് കാലവര്ഷം കേരളത്തില് എത്തിച്ചേരുമെന്നാണ് കാലാവസ്ഥ വകുപ്പ് നേരത്തെ അറിയിച്ചിരുന്നത്.
