കാസര്‍ഗോഡ്: കേരളത്തില്‍ കോവിഡ് നിയന്ത്രണം കര്‍ശനമായി നിലനില്‍ക്കുന്ന സാഹചര്യത്തില്‍ കര്‍ണാടകയില്‍ നിന്ന് കേരളത്തിലേക്ക് ആളെ കടത്തിയ പഞ്ചായത്ത് അംഗത്തിനെതിരേ കേസ്. കാസര്‍ഗോഡ് ദേലംപാടി പഞ്ചായത്തിലെ വാര്‍ഡംഗം കൊറഗപ്പാ റായിക്കെതിരെയാണ് പോലീസ് കേസ് രജിസ്റ്റര്‍ ചെയ്തത്. കോണ്‍ഗ്രസ് പാര്‍ട്ടി പ്രവര്‍ത്തകനാണ് ഇദ്ദേഹം.
മഹാരാഷ്ട്രയില്‍നിന്ന് എത്തിയ ആളെ കര്‍ണാടകത്തിലെ സുള്ള്യയില്‍ നിന്നാണ് ഇയാള്‍ അതിര്‍ത്തി കടത്തിയത്. കേരളത്തിലേക്ക് കടക്കാനുള്ള പാസ് ഇവരുടെ കൈവശമില്ലായിരുന്നു. ഇയാളെ തടഞ്ഞപ്പോള്‍ പഞ്ചായത്തംഗം എന്ന അധികാരം കര്‍ണാടക അതിര്‍ത്തിയില്‍ ഉപയോഗപ്പെടുത്തി ഇയാള്‍ കേരളത്തിലേക്ക് ആളെ എത്തിക്കുകയായിരുന്നു. പോലീസ് പരിശോധനയില്ലാതിരുന്ന കാട്ടുവഴിയിലൂടെയാണ് ഇരുവരും ദേലംപാടിയിലെത്തിയത്. ഇരുവരെയും ഇപ്പോള്‍ ക്വാറന്റെനില്‍ പ്രവേശിപ്പിച്ചിരിക്കുകയാണ്.
