തിരുവനന്തപുരം: നിയമത്തെ സംബന്ധിച്ച സംശയങ്ങളും ആശങ്കകളും കണക്കിലെടുത്താണു പൊലീസ് നിയമ ഭേദഗതി ഓർഡിനൻസ് പിൻവലിച്ചതെന്നു മുഖ്യമന്ത്രി പിണറായി വിജയൻ. പിൻവലിക്കൽ ഓർഡിനൻസ് പുറത്തിറക്കും. പൊതു അഭിപ്രായം ശേഖരിച്ച് നിയമസഭയിൽ ചർച്ച ചെയ്ത് തുടർന്നുള്ള കാര്യങ്ങൾ തീരുമാനിക്കും. ഓർഡിനൻസിലൂടെ നിയമം നടപ്പിലാക്കാൻ ഉദ്ദേശിക്കുന്നില്ലെന്നും മുഖ്യമന്ത്രി പറഞ്ഞു.
നിയമത്തിന്റെ അപര്യാപ്തത ഉള്ളതിനാൽ ആളുകൾ നിയമം കയ്യിലെടുക്കുന്ന സാഹചര്യം ഒഴിവാക്കണം എന്ന് അഭിപ്രായമുയർന്നപ്പോഴാണ് സർക്കാർ ഓർഡിനൻസ് കൊണ്ടുവന്നത്. വ്യക്തികൾക്കെതിരെ സമൂഹമാധ്യമങ്ങളിലെ ആക്ഷേപം വർധിച്ചു. അത്തരം സംഭവങ്ങൾ തടയണമെന്ന ആവശ്യം പ്രതിപക്ഷത്തുനിന്നടക്കം ഉയർന്നു.
സമൂഹ മാധ്യമങ്ങളിലെ ആക്ഷേപംമൂലം കുടുംബ ജീവിതങ്ങൾ താറുമാറായ സംഭവം ഉണ്ടായി. സ്ത്രീകളുടെ ഫോട്ടോ എഡിറ്റു ചെയ്ത് മോശമായി പ്രചരിപ്പിച്ചു. ഇതെല്ലാം പരിഗണിച്ചാണ് സദുദ്ദേശ്യത്തോടെ നിയമം കൊണ്ടുവന്നത്. അതു ദുരുപയോഗപ്പെടുത്താൻ സാധ്യതയുണ്ടെന്ന് പലരും ചൂണ്ടിക്കാട്ടിയതിനാലാണ് ഓർഡിനൻസ് പിൻവലിക്കാൻ തീരുമാനിച്ചത്. ഏതെങ്കിലും മാധ്യമത്തിന്റെ പ്രവർത്തനത്തെ തടസ്സപ്പെടുത്തുന്നത് സർക്കാർ നിലപാടല്ല. മാധ്യമങ്ങളോട് ശത്രുതാപരമായ സമീപനം സർക്കാരിനില്ലെന്നും മുഖ്യമന്ത്രി പറഞ്ഞു. വികല മനസുകൾ സ്ത്രീകൾക്കെതിരെ പ്രവർത്തിക്കുന്നുണ്ട്. അത്തരം ആളുകൾ പിന്‍വാങ്ങണം, സമൂഹം ജാഗ്രത പാലിക്കണം എന്നും മുഖ്യമന്ത്രി പറഞ്ഞു.
