പാലായിലും സമീപ പ്രദേശങ്ങളിലും നിങ്ങളുടെ വിശേഷാവസരങ്ങൾ HD ലൈവ് സ്ട്രീം ചെയ്യുന്നതിനായി വിളിക്കൂ.. 85901 76743
പാലാ: മാണി സി കാപ്പൻ എം എൽ എ നേരിട്ടിടപെട്ടതോടെ മുനിസിപ്പൽ സ്റ്റേഡിയം ജംഗ്ഷനിൽ രൂപപ്പെട്ട കുഴികൾ പൊതുമരാമത്ത് വകുപ്പ് അടച്ചു. സ്റ്റേഡിയം ജംഗ്ഷനു സമീപം റോഡിൽ വലിയ കുഴികൾ രൂപപ്പെട്ടിരുന്നു. കുഴികളിൽ ചാടി വാഹനങ്ങൾക്കു കേടുപാടുകൾ സംഭവിക്കുന്നതും നിത്യ സംഭവമായിരുന്നു.
കനത്ത മഴ പെയ്താലോ രാത്രിയായാലോ ഈ കുഴികൾ ഡ്രൈവർമാർക്കു കാണാൻ സാധിക്കാത്ത അവസ്ഥയിലായിരുന്നു. മഴയ്ക്കു മുമ്പ് ഈ ഭാഗത്തെ ടാറിംഗ് ഇളകിപ്പോയിത്തുടങ്ങിയിരുന്നുവെങ്കിലും സമയോചിതമായി പൊതുമരാമത്ത് വകുപ്പ് നടപടി സ്വീകരിക്കാത്തതിൽ വ്യാപക പരാതി ഉയർന്നിരുന്നു.
വിഷയം ശ്രദ്ധയിൽപ്പെട്ട മാണി സി കാപ്പൻ എം എൽ എ റോഡിലെ കുഴികൾ അടയ്ക്കാൻ പൊതുമരാമത്ത് വകുപ്പ് അധികൃതർക്കു നിർദ്ദേശം നൽകുകയായിരുന്നു. തുടർന്നു സംഭവ സ്ഥലത്തെത്തിയ എം എൽ എ യുടെ സാന്നിദ്ധ്യത്തിൽ പൊതുമരാമത്ത് അധികൃതർ റോഡിലെ കുഴികൾ അടച്ചു. നിരന്തരം പ്രശ്നം ഉണ്ടാവുന്ന ഈ ഭാഗത്ത് ടൈൽ പാകാൻ അധികൃതർക്കു നിർദ്ദേശം നൽകിയതായി മാണി സി കാപ്പൻ അറിയിച്ചു.
മുനിസിപ്പൽ കൗൺസിലർ ജിമ്മി ജോസഫ്, അഡ്വ ബേബി സൈമൺ, ടി വി ജോർജ്, എം പി കൃഷ്ണൻനായർ എന്നിവരും എം എൽ എ യ്ക്കൊപ്പം ഉണ്ടായിരുന്നു. റോഡിൻ്റെ കുഴികൾ അടയ്ക്കാൻ അടിയന്തിര നടപടി സ്വീകരിച്ച മാണി സി കാപ്പൻ എം എൽ എ യെ ജനവേദി അഭിനന്ദിച്ചു. എബി ജെ ജോസ് അധ്യക്ഷത വഹിച്ചു. സാംജി പഴേപറമ്പിൽ, അനൂപ് ചെറിയാൻ, ബിനു പെരുമന, ജോസഫ് കുര്യൻ, ജസ്റ്റിൻ ജോർജ്, വിദ്യാധരൻ വി റ്റി, ബിനോഷ് പി പി തുടങ്ങിയവർ പ്രസംഗിച്ചു.
