തീക്കോയി പഞ്ചായത്തിൽ പഞ്ചായത്ത് കമ്മറ്റിക്കിടെ സിപിഎം സിപിഐ അംഗങ്ങൾ തമ്മിൽ ഏറ്റുമുട്ടി. സിപിഎം അംഗമായ സിബിയും സിപിഐ അംഗമായ രതീഷും തമ്മിലാണ് വാക്കേറ്റവും കയ്യാങ്കളിയും ഉണ്ടായത്.
7,8 വാർഡുകളിലൂടെ കടന്നുപോകുന്ന മലമേൽ റോഡ് നിർമാണവുമായി ബന്ധപ്പെട്ടാണ് തർക്കം ഉണ്ടായത്. നിരവധി കുടുംബങ്ങൾ താമസിയ്ക്കുന്ന മലമേൽ ഭാഗത്തേയ്ക്ക് റോഡ് നിർമാണം ഈയിടെയാണ് ആരംഭിച്ചത്. ഇതിന്റെ മറവിൽ കല്ല് പൊട്ടിച്ച് കടത്തുന്നുവെന്നാണ് സിപിഎം ആരോപണം. എന്നാൽ റോഡ് കടന്നുപോകുന്ന വഴികളിലുള്ള കല്ലാണ് പൊട്ടിച്ചു നീക്കിയതെന്നാണ് രതീഷ് പറയുന്നത്.
കഴിഞ്ഞ ദിവസം സ്ഥലത്ത് എത്തിയ കളക്ടറുമായി സംസാരിക്കുകയും നിർമാണം തുടരുന്നതിന് കളക്ടർ അനുമതി നല്കിയതായും രതീഷ് പറയുന്നു. ഇന്ന് ചേർന്ന കമ്മറ്റിയിൽ ഈ റോഡ് നിർമാണം അജണ്ടയായി ഉൾപ്പെടുത്തിയിരുന്നു. ഇന്ന് ചേർന്ന കമ്മറ്റിയ്ക്കിടെ പാറ പൊട്ടിച്ചതും മരം മുറിച്ചതുമടക്കം എസ്പി യ്ക്ക് പരാതി നല്കണമെന്ന് സിബി ആവശ്യപ്പെട്ടു. ഇത് സംബന്ധിച്ചാണ് വാക്കുതർക്കം തുടങ്ങിയത്.
തർക്കം മൂത്ത് ഇരുവരും തമ്മിലുള്ള കയ്യാങ്കളിയിൽ കലാശിക്കുകയായിരുന്നു. രതീഷിന്റെ മുഖത്ത് നഖം കൊണ്ട് മുറിവേറ്റു. സംഭവത്തിൽ ഇരുവരും പരാതി നല്കിയിട്ടില്ല.
