ആലുവയിൽ അഞ്ച് വയസ്സുകാരിയെ ക്രൂരമായി ബലാത്സംഗം ചെയ്ത് കൊലപ്പെടുത്തിയ കേസിൽ പ്രതി അസ്ഫാക് ആലത്തിന് വധശിക്ഷ വിധിച്ചു. പ്രതിക്ക് പരമാവധി ശിക്ഷ നൽകണമെന്ന പ്രോസിക്യൂഷന്റെ ആവശ്യം കോടതി അംഗീകരിക്കുകയായിരുന്നു. ശിശു ദിനത്തിലാണ് കേരളത്തിന്റെ മനഃസാക്ഷിയെ ഞെട്ടിച്ച ഒരു ക്രൂരകൊലപാതകത്തിൽ പ്രതിക്ക് വധശിക്ഷ വിധിക്കുന്നത്.
എറണാകുളം പോക്സോ കോടതി ജഡ്ജി കെ സോമനാണ് വിധി പറഞ്ഞത്. ജൂലൈ 28നാണ് ബിഹാർ സ്വദേശികളുടെ അഞ്ച് വയസ്സുകാരി മകളെ അസ്ഫാക് ആലം തട്ടിക്കൊണ്ടുപോയി ബലാത്സംഗം ചെയ്ത് കൊലപ്പെടുത്തിയത്. കേസിൽ പ്രത്യേക സംഘം രൂപീകരിച്ചാണ് അന്വേഷണം നടന്നത്. 30 ദിവസത്തിൽ കുറ്റപത്രം സമർപ്പിച്ചു. ഒക്ടോബർ 4ന് കേസിലെ വിചാരണ ആരംഭിച്ചു. 26 ദിവസം കൊണ്ട് മിന്നൽ വേഗത്തിൽ വിചാരണ പൂർത്തിയാക്കി.
തെളിഞ്ഞ കുറ്റങ്ങളിൽ മൂന്നെണ്ണത്തിന് പരമാവധി വധശിക്ഷ വരെ ലഭിച്ചേക്കാം. അസ്ഫാക് ആലത്തിന് മനഃസാക്ഷിയില്ലെന്നും വധശിക്ഷ തന്നെ വിധിക്കണമെന്നുമായിരുന്നു പ്രോസിക്യൂഷന്റെ ആവശ്യം. എന്നാൽ പ്രതിക്ക് 28 വയസ്സ് മാത്രമേയുള്ളുവെന്നും മാനസാന്തരത്തിനുള്ള സാധ്യത കണക്കിലെടുത്ത് കുറഞ്ഞ ശിക്ഷ നൽകണമെന്നാണ് പ്രതിഭാഗം വാദിച്ചത്.
