കോട്ടയം: കോട്ടയം പുതുപ്പള്ളിക്ക് സമീപം നിയന്ത്രണം വിട്ട ആംബുലന്സുകള് കൂട്ടിയിടിച്ച് പത്ത് വയസുകാരന് മരിച്ചു. തേവരുച്ചിറ റെജിയുടെ മകന് റോഷനാണ് (10) മരിച്ചത്. വാകത്താനത്തിനും പുതുപ്പള്ളിയ്ക്കും ഇടയില് വെച്ചാണ് അപകടമുണ്ടായത്.
അമിത വേഗതയിലെത്തിയ രണ്ട് ആംബുലന്സുകള് കൂട്ടിയിടിക്കുകയായിരുന്നു. തുടര്ന്ന് നിയന്ത്രണം വിട്ട ആംബുലന്സുകളില് ഒന്ന് സാധനങ്ങള് വാങ്ങുന്നതിനായി കടയിലേക്ക് നടന്നുവരികയായിരുന്ന കുട്ടിയെ ഇടിക്കുകയായിരുന്നു.
തുടര്ന്ന് സമീപത്തുള്ള കടയുടെ മുമ്പിലെ പോസ്റ്റിലിടിച്ചാണ് ആംബുലന്സ് നിന്നത്. ആംബുലന്സില് രോഗികള് ആരും ഉണ്ടായിരുന്നില്ല. ഗുരുതരമായി പരുക്കേറ്റ കുട്ടിയെ കോട്ടയം മെഡിക്കല് കോളജ് ആശുപത്രിയില് എത്തിച്ചെങ്കിലും മരിച്ചു. രണ്ടു ആശുപത്രികളിലേക്ക് നഴ്സുമാരെ കൊണ്ടു വന്നതാണ് ആംബുലന്സ്.
