പത്തനംതിട്ട: ഇരട്ട നരബലി നടന്ന ഇലന്തൂരിലെ വീട്ടില് കൂടുതല് പേര് ഇരകളായെന്ന സംശയം ബലപ്പെടുന്നു. വീടിന്റെ കിഴക്കുവശത്തുനിന്ന് അസ്ഥികളും കണ്ടെടുത്തു. ഇത് മനുഷ്യന്റേത് തന്നെയാണോയെന്ന് വ്യക്തമല്ല. ഫോറന്സിക് സംഘം ഇത് പരിശോധിക്കും.
റോസ്ലിയുടെ മൃതദേഹം കണ്ടെത്തിയ സ്ഥലത്തിന് സമീപത്ത് നിന്നാണ് അസ്ഥി കഷ്ണം കണ്ടെത്തിയത്. പ്രത്യേകം പരിശീലനം ലഭിച്ച മായ, മര്ഫി നായ്ക്കളെ ഉപയോഗിച്ചാണ് പൊലീസ് പരിശോധന നടത്തുന്നത്.
നരബലിയില് കൂടുതല് ഇരകളുണ്ടെന്ന സംശയം പൊലീസിനുണ്ട്. നായ മണം പിടിച്ച മരത്തിന്റെ ചുവട്ടിലും പൊലീസ് പരിശോധിക്കുന്നുണ്ട്. വീട്ടുവളപ്പില് പല ഭാഗങ്ങളിലായി മഞ്ഞള് കൃഷിയുണ്ട്. സാധാരണ മഞ്ഞള് നടുന്ന രീതിയിലല്ല ഇത്.
ഒരോ ഭാഗത്തും കുറച്ചു കുറച്ചായിട്ടാണ് നട്ടിരിക്കുകയാണ്. ഈ സ്ഥലങ്ങളില് മൃതദേഹം കുഴിച്ചിട്ടിട്ടുണ്ടോയെന്നാണ് പൊലീസിന് സംശയം. കൂടാതെ പ്രതികളെ ചോദ്യം ചെയ്തപ്പോള് നിര്ണായക വിവരങ്ങള് ലഭിച്ചിട്ടുണ്ടെന്നാണ് സൂചന.
അടുത്തിടെ ചെമ്ബകം നട്ട പ്രദേശത്തും നായ മണം പിടിച്ച് നിന്നിരുന്നു. ഭഗവല് സിംഗിന്റെ വീടിനുള്ളില് ഫോറന്സിക് പരിശോധനയും പുരോഗമിക്കുകയാണ്.
