പാലാ ഗവണ്‍മെന്റ് ആയുര്‍വേദ ആശുപത്രിയുടെ ഉദ്ഘാടനം കെ.എം. മാണി നിര്‍വഹിക്കും.
പാലാ നഗരസഭയുടെ നേതൃത്വത്തില്‍ മുണ്ടുപാലത്ത് നിര്‍മാണം പൂര്‍ത്തീകരിച്ച ഗവണ്‍മെന്റ് ആയുര്‍വേദ ആശുപത്രിയുടെ ഉദ്ഘാടനം 26 നു രാവിലെ 11 നു മന്ത്രി കെ.എം. മാണി നിര്‍വഹിക്കും. നഗരസഭാധ്യക്ഷന്‍ കുര്യാക്കോസ് പടവന്‍ അധ്യക്ഷത വഹിക്കും. ജോസ് കെ. മാണി എംപി ഐപി, ഒപി വിഭാഗത്തിന്റെ ഉദ്ഘാടനവും വൈസ് ചെയര്‍പേഴ്‌സണ്‍ ഡോ. ചന്ദ്രികാദേവി ഫാര്‍മസിയുടെ ഉദ്ഘാടനവും നിര്‍വഹിക്കും. പഞ്ചകര്‍മവിഭാഗം ഉദ്ഘാടനം അഡ്വ. ബെറ്റി ഷാജു നിര്‍വഹിക്കും. ഡിഎംഒ ഡോ. രതി വി. ഉണ്ണിത്താന്‍, സ്റ്റാന്‍ഡിംഗ് കമ്മിറ്റി ചെയര്‍മാന്മാരായ ഷാജു വി. തുരുത്തേല്‍, ലീന സണ്ണി, ആന്റോ ജോസ് പടിഞ്ഞാറെക്കര, കൗണ്‍സിലര്‍മാര്‍ തുടങ്ങിയവര്‍ പ്രസംഗിക്കും. അഡ്വ. ബിനു പുളിക്കകണ്ടം സ്വാഗതവും ഡോ. എസ്. ജയകുമാര്‍ നന്ദിയും പറയും. മുനിസിപ്പല്‍ സെക്രട്ടറി കെ.ജി. രവീന്ദ്രന്‍ റിപ്പോര്‍ട്ട് അവതരിപ്പിക്കും. 48 ലക്ഷം രൂപ ചെലവഴിച്ചാണ് ആശുപത്രികെട്ടിടം നിര്‍മാണം പൂര്‍ത്തീകരിച്ചത്. എംഎല്‍എയുടെ പ്രാദേശിക വികസനഫണ്ടില്‍നിന്ന് എട്ടു ലക്ഷം രൂപയും നഗരസഭയുടെ തനതു ഫണ്ടില്‍നിന്നു മൂന്നു ലക്ഷം രൂപയും ബാക്കി തുക ജനകീയാസൂത്രണ പദ്ധതിയിലും പെടുത്തിയാണ് 20 കിടക്കകളോടുകൂടിയ ബഹുനില മന്ദിരം നിര്‍മാണം പൂര്‍ത്തീകരിച്ചത്.
