13 വയസ്സു മുതൽ 20 വയസ്സ് വരെയുള്ള പെൺകുട്ടികളെ സഹായിക്കുന്നതിനും സംരക്ഷണം ഒരുക്കുന്നതിനും ഒപ്പം അധ്യാപകർ, മാതാപിതാക്കൾ എന്നിവർക്ക് കൂടി ബോധവൽക്കരണം നടത്തുന്നതിനുമായി പാലാ പോലീസ് ആവിഷ്കരിച്ച "നമ്മുടെ പൊന്നോമനകൾ" എന്ന ബോധവൽക്കരണ പരിപാടിയുടെ ഔപചാരികമായ ഉദ്ഘാടനം ഇരുപത്തിനാലാം തീയതി നടക്കുമെന്ന് പാലാ ഡിവൈഎസ്പി ഷാജു ജോസ് പാലായിൽ പത്രസമ്മേളനത്തിൽ അറിയിച്ചു.
പാലാ അൽഫോൻസാ കോളേജ് ഓഡിറ്റോറിയത്തിൽ രാവിലെ 10. 30 ന് ചേരുന്ന സമ്മേളനത്തിൽ "നമ്മുടെ പൊന്നോമനകൾ" പദ്ധതിയുടെ ഉദ്ഘാടനം ഡിജിപി ( ഫയർഫോഴ്സ് മേധാവി) ഡോ.ബി.സന്ധ്യ ഐ പി എസ് നിർവഹിക്കും.
പെൺകുട്ടികൾക്ക് ഏതെങ്കിലും രീതിയിലുള്ള ബുദ്ധിമുട്ടുകൾ ഉണ്ടായാൽ അവയ്ക്ക് പരിഹാരം കാണാനും കുഴപ്പം പിടിച്ച രീതിയിലേക്ക് അത്തരം കാര്യങ്ങൾ നീങ്ങാതെ ഇരിക്കാനും കർശന നിരീക്ഷണത്തിൽ കൗൺസിലിംഗോടും കൂടിയ പദ്ധതിയാണ് "നമ്മുടെ പൊന്നോമനകൾ". പാലാ ഡിവൈഎസ്പി ഷാജു ജോസ് ആവിഷ്കരിച്ച ഈ പദ്ധതി കോട്ടയം ജില്ലാ വനിത ഹെൽപ്പ് ലൈനിന്റെയും വനിതാ സെല്ലിന്റെയും സഹായത്തോടെയാണ് നടപ്പാക്കുന്നത്.
പാലാ സബ് ഡിവിഷനിൽ ആരംഭിച്ച ഈ പദ്ധതി കോട്ടയം ജില്ലയിൽ ഉടനീളം വ്യാപിപ്പിക്കാൻ തീരുമാനിച്ചിട്ടുണ്ടെന്ന് കോട്ടയം പോലീസ് ചീഫ് ഡി.ശില്പ അറിയിച്ചിട്ടുണ്ടെന്നും ഇത് വളരെ അഭിമാനകരമായി കാണുന്നുവെന്നും ഡിവൈഎസ്പി പറഞ്ഞു. പത്രസമ്മേളനത്തിൽ സിഐ മാരായ കെ.പി തോംസൺ, കെ.എൻ രാജേഷ്, പ്രസാദ് എബ്രഹാം എന്നിവരും പങ്കെടുത്തു.
