മേലുകാവിൽ അപകടം. ഇടിയുടെ ആഘാതത്തിൽ ജീപ്പ് പൂർണമായും തകർന്നു.

മേലുകാവിൽ ജീപ്പും ലോറിയും കൂട്ടിയിടിച്ച് അപകടം. മേലുകാവ് മറ്റത്തിനും പാണ്ടിയൻമാവിനും ഇടയിൽ വലിയ വളവിൽ രാവിലെ അഞ്ചേകാലോടെയാണ് അപകടം ഉണ്ടായത്.  കോട്ടയത്തുനിന്ന് പത്രവുമായി കാഞ്ഞിരം കവലയിലേക്ക് പോയ ജീപ്പും തൊടുപുഴയിൽ നിന്നും ബേക്കറി ഉത്പന്നങ്ങളുമായി വരികയായിരുന്ന ലോറിയുമാണ് കൂട്ടി ഇടിച്ചത്. ഇടിയുടെ ആഘാതത്തിൽ ജീപ്പ് പൂർണമായും തകർന്നു.

 

അപകടത്തിൽ ജീപ്പ് ഡ്രൈവർ അതിരമ്പുഴ സ്വദേശി സതീഷിന് ഗുരുതരമായി പരിക്കേറ്റു. പോലീസും ഫയർഫോഴ്സും സ്ഥലത്തെത്തി സതീഷിനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. പതിവുപോലെ മേലുകാവ് മറ്റത്ത് പത്രക്കെട്ട് ഇറക്കിയശേഷം കുശലം പറഞ്ഞ് ജീപ്പിൽ കയറി പോയ സതീഷ് രണ്ട് വളവുകൾക്കപ്പുറം അപകടത്തിൽ പെടുകയായിരുന്നുവെന്ന് നാട്ടുകാർ പറഞ്ഞു. ഇറക്കം ഇറങ്ങിവന്ന ലോറി ഡ്രൈവർക്ക് നിയന്ത്രണം നഷ്ടപ്പെട്ടതോ ഉറങ്ങിപ്പോയതോ ആവാം അപകട കാരണമെന്ന് കരുതുന്നു. ഇടിയുടെ ആഘാതത്തിൽ ലോറി ജീപ്പിന് മുകളിലേക്ക് ചാഞ്ഞ്കയറി റോഡിൽ മറിയുകയായിരുന്നു. ജീപ്പ് പൂർണമായും തകർന്നു.