വൈക്കം: വൈക്കം തലയോലപ്പറമ്പിൽ ഡ്യൂട്ടി കഴിഞ്ഞ് വീട്ടിലേയ്ക്ക് മടങ്ങിയ എസ്.ഐ ബൈക്ക് അപകടത്തിൽ മരിച്ചു. വെള്ളൂർ പൊലീസ് സ്റ്റേഷനിലെ എസ്.ഐ ടിവി പുരം സ്വദേശി സജിയാണ് (53) മരിച്ചത്. ബൈക്കും ടെമ്പോ ട്രാവലറും കൂട്ടിയിടിച്ച് രാത്രി പത്ത് മണിയോടെയായിരുന്നു അപകടം.
വെള്ളൂർ പോലീസ് സ്റ്റേഷനിലെ എസ്ഐ ആയ സജീ ഡ്യൂട്ടിക്ക് ശേഷം വീട്ടിലേക്ക് മടങ്ങവേയാണ് അപകടം ഉണ്ടായത്. എതിർ ദിശയിൽ നിന്നെത്തിയ ടെമ്പോ ട്രാവലർ നിയന്ത്രണംവിട്ട് സജിയുടെ ബൈക്കിൽ ഇടിക്കുകയായിരുന്നു.
ഇടിയുടെ ശക്തിയിൽ റോഡിലേക്ക് തെറിച്ചുവീണ സജിയ്ക്ക് ഗുരുതരമായി പരിക്കേറ്റു. നാട്ടുകാർ ഉടൻ തന്നെ തെള്ളകത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ തലയോലപ്പറമ്പ് പോലീസ് കേസെടുത്തു.
