പാലാ: തീക്കോയി - തലനാട് റോഡ് ബി എം ആൻ്റ് ബി സി ടാറിംഗ് നടത്തി നവീകരിക്കുന്നതിന് 6.90 കോടി രൂപയുടെ ഭരണാനുമതി ലഭിച്ചതായി മാണി സി കാപ്പൻ എംഎൽഎ അറിയിച്ചു. 2020ലെ ബജറ്റിൽ തീക്കോയി പാലം വീതി കൂട്ടി നവീകരിക്കുന്നതിനുൾപ്പെടെ 8 കോടി രൂപ അനുവദിച്ചിരുന്നു.
പാലത്തിന് 50 വർഷത്തിലേറെ പഴക്കമുള്ളതിനാൽ വീതി കൂട്ടി നവീകരിക്കുന്നത് പ്രായോഗികമല്ലെന്ന് പൊതുമരാമത്ത് വകുപ്പ് കണ്ടെത്തിയതിനെത്തുടർന്ന് പദ്ധതി നടപ്പാക്കുന്നതിന് തടസ്സം നേരിട്ടു.
തുടർന്ന് പാലം വീതി കൂട്ടുന്നത് ഒഴിവാക്കിയുള്ള എസ്റ്റിമേറ്റ് തയ്യാറാക്കണമെന്ന് മാണി സി കാപ്പൻ എം എൽ എ നിർദ്ദേശിച്ചു. ഇതേത്തുടർന്ന് പുതുക്കിയ എസ്റ്റിമേറ്റ് തയ്യാറാക്കുകയും സർക്കാർ ഭരണാനുമതി നൽകുകയുംചെയ്തു.
മഴ മാറിയാലുടൻ നവീകരണത്തിനുള്ള നടപടികൾ ആരംഭിക്കുമെന്നും മാണി സി കാപ്പൻ പറഞ്ഞു.
