വൈവിധ്യമാർന്ന ഉത്പന്നങ്ങളുടെ വൻ ശേഖരവുമായി എന്റെ കേരളം’ പ്രദർശന-വിപണന മേള കോട്ടയം നാഗമ്പടം മൈതാനത്ത് പുരോഗമിയ്ക്കുന്നു. നിരവധിയാളുകളാണ് മേളയിലേയക്ക് ദിവസേന എത്തുന്നത്. മേള 22 വരെ നീണ്ടുനിൽക്കും.
രണ്ടാം പിണറായി വിജയൻ സർക്കാരിന്റെ രണ്ടാം വാർഷികത്തിന്റെ ഭാഗമായി സംഘടിപ്പിക്കുന്ന ‘എന്റെ കേരളം’ പ്രദർശന-വിപണനമേളയ്ക്ക് ചൊവ്വാഴ്ചയാണ് തുടക്കമായത്.
പ്രദർശന-വിപണനമേളയിൽ 202 സ്റ്റാളുകളാണുള്ളത്. 70 പ്രദർശന-സർവീസ് സ്റ്റാളുകളും 132 വില്പന സ്റ്റാളുകളുമുണ്ട്. 42,000 ചതുരശ്രയടിയിൽ ശീതികരിച്ച പന്തലിലാണ് സ്റ്റാളുകൾ ക്രമീകരിച്ചിരിക്കുന്നത്. പ്രവേശനം സൗജന്യമാണ്. രാവിലെ 10 മണി മുതൽ വൈകീട്ട് 9.30 വരെയാണ് പ്രദർശനം.
വിവിധ വകുപ്പുകളുടെ സർവീസ് സ്റ്റാളുകൾ വഴി പൊതുജനങ്ങൾക്ക് സൗജന്യ ഓൺലൈൻ സേവനങ്ങളടക്കം ലഭ്യമാകും. കുട്ടികളുടെ ആധാർ എൻറോൾമെന്റ്, ആധാർ എടുക്കാനും ഫോട്ടോ, ബയോ-മെട്രിക് വിവരങ്ങൾ അടക്കം തിരുത്തലുകൾ വരുത്തൽ, 10 വർഷത്തിനുമുകളിലായ ആധാർ പുതുക്കൽ, വോട്ടർ ഐഡി കാർഡ് സേവനങ്ങൾ, റേഷൻ കാർഡ് ഓൺലൈൻ സേവനങ്ങൾ തുടങ്ങി സർക്കാർ ഓൺലൈൻ സേവനങ്ങൾ സർവീസ് ചാർജില്ലാതെ അക്ഷയ സ്റ്റാളുകൾ വഴി ലഭ്യമാകും.
ആരോഗ്യവകുപ്പിന്റെ സ്റ്റാളുകൾ വഴി സ്ത്രീകൾക്ക് സൗജന്യ ഹീമോഗ്ളോബിൻ പരിശോധന, രക്തസമ്മർദം, ഫാറ്റ് റേഷ്യോ പരിശോധന എന്നിവ ലഭ്യമാക്കും. ഇ-ഹെൽത്ത് തിരിച്ചറിയൽ കാർഡ് വിതരണവും നടക്കും. ജലത്തിന്റെയും ഭക്ഷണത്തിന്റെയും ഗുണനിലവാര പരിശോധനകളും ലഭ്യമാണ്.
