കെഎസ്ഇബി–എംവിഡി പോര് തുടരുന്നു..ഫ്യൂസ് ഊരൽ വീണ്ടും

കണ്ണൂർ മട്ടന്നൂർ ആർടിഒ എൻഫോഴ്‌സ്‌മെന്റ് ഓഫിസിലെ വൈദ്യുതി കെഎസ്ഇബി ഉദ്യോഗസ്ഥർ വിച്ഛേദിച്ചു. വൈദ്യതി ബിൽ കുടിശിക ഉള്ളതിനാലാണ് വൈദ്യുതി വിച്ഛേദിച്ചത്. 

52,820 രൂപയാണ് കുടിശിക ഉള്ളത്. ഏപ്രിൽ, മേയ്‌ മാസങ്ങളിലെ തുകയാണിത്. കണ്ണൂർ ജില്ലയിലെ റോഡ് ക്യാമറകൾ നിയന്ത്രിക്കുന്നത് ഈ ഓഫിസിൽനിന്നാണ്.

ഇന്നു രാവിലെയാണ് കെഎസ്ഇബി ഉദ്യോഗസ്ഥരെത്തി ആർടിഒ ഓഫിസിലെ ഫ്യൂസ് ഊരിയത്. ബിൽ അടയ്ക്കാത്ത സംഭവത്തിൽ മുൻപും ഈ ഓഫിസിലെ ഫ്യൂസ് ഊരിയിട്ടുണ്ടെന്നാണു വിവരം.

വയനാട്ടിൽ ‘ടച്ച് വെട്ടാൻ’ തോട്ടിയുമായി പോയ ജീപ്പിന് പിഴ നോട്ടിസ് അയച്ച റോഡ് ക്യാമറ കൺട്രോൾ റൂമിന്റെ ഫ്യൂസ് ബിൽ അടയ്ക്കാത്തതിനെത്തുടർന്ന് കെഎസ്ഇബി ഊരിയത് വിവാദമായത് അടുത്തിടെയാണ്.