ചോനമലയില്‍ പാറ ഉരുണ്ട് വീണ് വ്യാപക നാശനഷ്‌ടം

അടുക്കം ചോനമലയില്‍ കൂറ്റൻപാറ ഉരുണ്ട് വീണ് വീടിന് നാശനഷ്ടം. പുള്ളിക്കാനം മലനിരകളില്‍ നിന്നുമാണ് വലിയ കല്ല്  ഉരുണ്ട് വന്നത്. 

തലനാട് പഞ്ചായത്ത് ആറാം വാർഡ് പേര്യമലയിൽ രാവിലെ എട്ടുമണിയോടെയാണ് സംഭവമുണ്ടായത്. മറ്റ് നാശനഷ്ടങ്ങൾക്കൊപ്പം പഞ്ചായത്ത് റോഡും തകർന്നു. മലയടിവാരത്തെ വലിയ കല്ല് അടർന്ന് താഴേക്ക് പുരയിടത്തിലൂടെ ഉരുണ്ടെത്തുകയായിരുന്നു. പെരിയത്ത് ശിവദാസിന്റെ വീടിനാണ് നാശനഷ്ടം സംഭവിച്ചത്. 

മോഹനൻ പാലൊന്നിൽ, രാമകൃഷ്ണൻ എണ്ണക്കനാട്ട് എന്നിവരുടെ പുരയിടങ്ങളിൽ വലിയ നഷ്ടവുമുണ്ടായി. കല്ലിന്റെ ചെറിയ ചീളുകൾ തെറിച്ച് സജീവന്റെ മകനും അമ്മയ്ക്കും നിസാര പരിക്കേറ്റു. ഇതുവഴി കടന്നുപോകുന്ന പഞ്ചായത്ത് റോഡ് പൂർണമായും തകർന്നു. 

പഞ്ചായത്ത് അം​ഗങ്ങളും ജനപ്രതിനിധികളും പൊലീസും സ്ഥലത്ത് സന്ദർശനം നടത്തി സ്ഥിതി​ഗതികൾ വിലയിരുത്തി.