ഇടുക്കിയിൽ കാട്ടുപന്നി ശല്യം രൂക്ഷം; കൂട്ടമായെത്തി വിളകൾ നശിപ്പിക്കുന്നു

ഇടുക്കി: കാട്ടുപന്നിയുടെ ആക്രമണം രൂക്ഷമാകുന്നു. ഇടുക്കി നെടുങ്കണ്ടം പ്രകാശ്ഗ്രാം മേഖലയിൽ ആണ് കാട്ടുപന്നികൾ കൂട്ടത്തോടെ എത്തി വിളകൾ നശിപ്പിച്ചത്.

ടിഷ്യു കൾച്ചറൽ വാഴ ഉൾപ്പെടെയുള്ള നിരവധി കൃഷി വിളകളാണ് കാട്ടുപന്നികൾ ഇല്ലാതാക്കിയത്. മുപ്പതോളം കാട്ടുപന്നികളാണ് കൃഷി സ്ഥലത്ത് എത്തുന്നത്. ഇതിനെതിരെ വനം വകുപ്പ് വിഷയത്തിൽ അനാസ്ഥ കാണിക്കുകയാണെന്നും നടപടി സ്വീകരിക്കണമെന്ന് ആവശ്യപ്പെട്ട് ഉദ്യോഗസ്ഥർക്ക് നാട്ടുകാർ പരാതി നൽകി.

കഴിഞ്ഞ രണ്ടു ദിവസത്തിനിടെയാണ് വ്യാപകമായ കാട്ടുപന്നി ആക്രമണം ഉണ്ടായത്. മുപ്പതോളം കാട്ടുപന്നികൾ അടങ്ങുന്ന സംഘമാണ് രാത്രികാലങ്ങളിൽ കൂട്ടമായി കൃഷിയിടത്തിലേക്ക് ഇറങ്ങുന്നത്. കപ്പ, വാഴ,പച്ചക്കറി, ഏലം തുടങ്ങിയ കൃഷി വിളകളെല്ലാം വ്യാപകമായി കാട്ടുപന്നികൾ നശിപ്പിച്ചു. തമിഴ്നാട് അതിർത്തി മേഖലയിൽ നിന്നും എത്തുന്ന കാട്ടുപന്നികളാണ് നാശനഷ്ടം ഉണ്ടാക്കുന്നതെന്നാണ് കർഷകർ പറയുന്നത്.

ഇതേസമയം അതിർത്തി മേഖലയ്‌ക്ക് പുറമേ തൂക്കുപാലം, അൻപതേക്കർ തുടങ്ങിയ മേഖലകളിലും കാട്ടുപന്നിയുടെ ശല്യം തുടരുകയാണ്. കാട്ട് പന്നികളെ വെടിവെച്ച് പിടികൂടാൻ പഞ്ചായത്തിന് അനുമതി നൽകിയിട്ടുണ്ടെങ്കിലും യാതൊരുവിധ നടപടിയും അധികൃതർ കൈക്കൊള്ളുന്നില്ലെന്നാണ് നാട്ടുകാരുടെ പരാതി.