ചന്ദ്രപ്പുര ജംഗ്ഷനിൽ ബസ് സ്റ്റോപ്പിന് സമീപം അപകടകരമായ രീതിയിൽ ഷീറ്റിൽ തങ്ങി നിൽക്കുന്ന ടെലഫോൺ പോസ്റ്റ്
മഞ്ഞപ്ര: ബസ് സ്റ്റോപ്പിൽ അപകട ഭീഷണിയായി ടെലഫോൺ പോസ്റ്റ്. ചന്ദ്രപ്പുര ജംഗ്ഷനിൽ അങ്കമാലി ഭാഗത്തേ ബസ് സ്റ്റോപ്പിലാണ് അപകടാവസ്ഥയിൽ നിലം പൊത്താറായ നിലയിൽ ചരിഞ്ഞ് നിൽക്കുന്ന ടെലഫോൺ പോസ്റ്റ്. വിദ്യാർത്ഥികളും സ്ത്രീകളും ഉൾപ്പെടെ നിരവധി പേരാണ് ഇവിടെ രാവിലെ മുതൽ ബസ് കാത്ത് നിൽക്കുന്നത്.
പകുതി ചാഞ്ഞ് നിൽക്കുന്ന ടെലഫോൺ പോസ്റ്റ് താഴെവീഴാതെ നിൽക്കുന്നത് തൊട്ടടുത്ത കടയുടെ ഷീറ്റിൽ തങ്ങിയാണ്. ചെറുതും വലതുമായ അനേകം വാഹനപകടങ്ങൾ കടന്നുപോകുന്ന ചന്ദ്രപ്പുരയുടെ ഹൃദയ ഭാഗത്താണ് വീഴാറായ അവസ്ഥയിൽ ടെലഫോൺ പോസ്റ്റ് സ്ഥിതി ചെയ്യുന്നത്.
മാസങ്ങൾക്ക് മുൻപ് ഏതോ ഒരു വാഹനം ഇടിച്ചാണ് ടെലഫോൺ പോസ്റ്റ് ചരിയാൻ ഇടയാതെന്ന് നാട്ടുകാർ ചൂണ്ടിക്കാട്ടി. വിവിധ ആവശ്യങ്ങൾക്കായി നൂറ് കണക്കിന് ആളുകൾ ദിവസേന വന്ന് പോകുന്ന ചന്ദ്രപ്പുരയിൽ അപകടകരമായ അവസ്ഥയിൽ നിൽക്കുന്ന പോസ്റ്റ് ഇവിടെ നിന്ന് നീക്കം ചെയ്യാൻ നാളിതു വരെ അധികൃതർ തയ്യറായിട്ടില്ല.
കൊച്ചു കുട്ടികൾ ഉൾപ്പെടെ ധാരാളം പേർ ഇവിടെ നിന്നാണ് ദിവസനേ ബസ് യാത്രയും മറ്റും ആശ്രയിക്കുന്നത്. ജനങ്ങളുടെ സുരക്ഷിത യാത്ര ഉറപ്പാക്കണമെന്നാണ് നാട്ടുകാർ ആവശ്യപ്പെടുന്നത്.
