വിമോചന സമര രക്തസാക്ഷി അനുസ്മരണം നടത്തി

അങ്കമാലി: ദേശീയപാതയിൽ നിന്ന് അങ്കമാലി നഗരസഭ മന്ദിരത്തിലേക്ക് പ്രവേശിക്കുന്ന റോഡിന് വിമോചന സമര രക്തസാക്ഷി റോഡ് എന്ന് നാമകരണം ചെയ്യണം, അങ്കമാലി ടൗൺ ചതുരത്തിൽ രക്തസാക്ഷികളുടെ ഓർമ്മക്കായി സ്മാരകം സ്ഥാപിക്കണം, ഇവരുടെ കുടുംബങ്ങളെ സംരക്ഷിക്കാൻ സർക്കാർ തലത്തിൽ നടപടി സ്വീകരിക്കണമെന്ന് കേരള പ്രതികരണ വേദി ആവശ്യപ്പെട്ടു.

ഇവരുടെ കുടുംബാംഗങ്ങൾക്ക് പ്രതികരണ വേദിയുടെ ആഭിമുഖ്യത്തിൽ പെൻഷൻ ഫണ്ടും പാരിതോഷികവും വിതരണം ചെയ്തു. രക്ത സാക്ഷികളുടെ ഓർമ്മക്കായി ബസിലീക്കയിൽ ദിവ്യബലി, തുടർന്ന് കല്ലറയിൽ അനുസ്മരണ പ്രാർതഥന, പുഷ്പ ചക്രം അർപ്പിക്കൽ, തിരി കത്തിക്കൽ, പൂവ് വിതറൽ എന്നിവ ഉണ്ടായിരുന്നു. 

അനുസ്മരണ പ്രാർത്ഥനകൾക്ക് ബസിലിക്ക റെക്ടർ ഫാ. ലൂക്കോസ് കുന്നത്തൂർ നേതൃത്വം നൽകി. വിമോചന സമര നേതാവ് അഡ്വ. ഗർവ്വാസീസ് അരീക്കൽ, മുനിസിപ്പൽ മുൻ ചെയർമാൻ എം.എൽ. ജോൺ, ഫാ. ജെൻസ് പാലച്ചുവട്ടിൽ, ഫാ. ആൻസൻ നടുപറമ്പിൽ, വേദി ചെയർമാൻ ജോസ് വാപ്പാലശേരി, മുനിസിപ്പൽ കൗൺസിലർമാരായ ബാസ്റ്റിൻ ഡി. പാറയ്ക്കൽ, ലില്ലി ജോയി, സാജു നെടുങ്ങാടൻ, പോൾ ജോവർ, ഷാൻ്റോ പടയാട്ടിൽ എന്നിവർ നേതൃത്വം നൽകി. 

തുടർന്ന് പള്ളി അങ്കണത്തിൽ നടന്ന അനുസ്മരണ സമ്മേളനം സീറോ മലബാർ സഭ അൽമായ ഫോറം സെക്രട്ടറി ടോണി ചിറ്റിലപ്പിള്ളി ഉദ്ഘാടനം ചെയ്തു. വേദി ജനറൽ സെക്രട്ടറി പി.ഐ നാദിർഷ അധ്യക്ഷത വഹിച്ചു. പ്രതികരണ വേദി ചെയർമാൻ ജോസ് വാപ്പാലശേരി അനുസ്മരണ പ്രഭാഷണം നടത്തി. 

എൻ.ആർ. രാമചന്ദ്രൻ നായർ, ഷൈബി പാപ്പച്ചൻ, എ.കെ. സുരേന്ദ്രൻ, ടിൻ്റോ പള്ളിപ്പാട്ട്, കെ.പി. ഗെയിൻ, ആൻ്റു പടയാട്ടിൽ, ഡേവീസ് കല്ലേലി, മാർട്ടിൻ കിഴക്കേടത്ത് എന്നിവർ പ്രസംഗിച്ചു.