പാരിസ് : പ്രകാശവർഷങ്ങൾക്കപ്പുറത്ത് പുതിയൊരു ഗ്രഹം രൂപപ്പെടുന്ന അത്യപൂർവ്വ ദൃശ്യം പകർത്താനായ ആവേശത്തിലാണ് ഗവേഷകർ. പാരീസിലെ PSL യൂണിവേഴ്‌സിറ്റിയിലെ ഒരു കൂട്ടം ഗവേഷകർ ആണ് ചരിത്രത്തിലാദ്യമായി പ്രപഞ്ചത്തിൽ ഒരു ഗ്രഹം രൂപപ്പെടുന്നതിന്റെ ദൃശ്യങ്ങൾ പകർത്തിയത്.
ഭൂമിയിൽ നിന്ന് 520 പ്രകാശവർഷങ്ങൾക്കപ്പുറം സ്ഥിതി ചെയ്യുന്ന A B ഓറിഗ എന്ന നക്ഷത്രത്തിന് സമീപമാണ് പുതിയ ഗ്രഹം രൂപപ്പെടുന്നത്. നക്ഷത്രത്തിന് സമീപം വാതകപടലങ്ങൾ രൂപംകൊള്ളുന്നത് ശ്രദ്ധിച്ചപ്പോഴാണ് പുതിയ ഗ്രഹം രൂപകൊള്ളുന്നത് ശ്രദ്ധയിൽപ്പെട്ടത്. ചിലിയിൽ സ്ഥാപിച്ചിട്ടുള്ള യൂറോപ്യൻ സതേൺ ഒബിസർവേറ്ററിയുടെ വെരി ലാർജ് ടെലിസ്കോപ്പ് ( VLC) ഉപയോഗിച്ചാണ് ഈ അപൂർവ്വ പ്രാപഞ്ചിക ദൃശ്യം പകർത്തിയെടുത്തത്.
ഡോ. ആന്റണി ബൊക്കാലെറ്റിയുടെ നേതൃത്വത്തിലുള്ള സംഘമാണ് ഈ ദൃശ്യങ്ങൾ പകർത്തിയത്.സൗരയൂഥത്തിൽ സൂര്യനിൽ നിന്ന് നെപ്റ്റിയൂൺ ഗ്രഹം നിലകൊള്ളുന്ന അത്രയും അകലത്തിലാണ് എ.ബി. ഓറിഗയിൽ നിന്ന് പുതിയ ഗ്രഹത്തിന്റെ സ്ഥാനം. ഗവേഷകരുടെ കണ്ടെത്തലുകൾ ആസ്ട്രോണമി ആൻഡ് ആസ്ട്രോഫിസികിസ് ജേർണലിൽ പ്രസിദ്ധീകരിച്ചിട്ടുണ്ട്
