തിരുവനന്തപുരം : സോളർ കേസിൽ സിബിഐയെ പേടിയില്ലെന്നും ഇതുവരെ അന്വേഷണങ്ങളെ നേരിട്ടു ഇനിയും തന്റേടത്തോടെ നേരിടുമെന്നും മുൻ മുഖ്യമന്ത്രി ഉമ്മൻ ചാണ്ടി പറഞ്ഞു . സർക്കാർ തീരുമാനത്തിനെതിരെ നിയമനടപടികളിലേക്കു പോവില്ല. ഏത് അന്വേഷണവുമായും സഹകരിക്കും. ന്യായീകരണമല്ല തന്റെ പ്രതിരോധം. ജനങ്ങൾ എല്ലാം കാണുന്നുണ്ട്. ആരാണു പരാതിക്കാരിയെന്നും പലതും മാറിയും മറിഞ്ഞും വന്നതും ജനം കാണുന്നുണ്ട്.
ഇങ്ങനെ ഒരു കേസുണ്ടെങ്കിൽ പിണറായി വച്ചേക്കുമോ എന്നു ജനം ചിന്തിക്കും. സർക്കാരിന്റെ പരാജയവും നിഷ്ക്രിയത്വവും മറയ്ക്കാനുള്ള തന്ത്രമാണിതെന്നും ഉമ്മൻ ചാണ്ടി പറഞ്ഞു.ആരോപണം ഉയർന്ന് 8 വർഷത്തിനിടെ ഏതെങ്കിലും കോടതിയോ അന്വേഷണ ഏജൻസികളോ ഞങ്ങൾ കുറ്റം ചെയ്തതായി കണ്ടെത്തിയിട്ടില്ല. എൽഡിഎഫ് സർക്കാർ എത്തി 5 കൊല്ലമായിട്ടും ഒന്നും ചെയ്യാനായില്ല. 3 ഡിജിപിമാരാണ് കേസ് അന്വേഷിച്ചത്. തുടർനടപടികളെടുക്കാൻ കഴിയാതിരുന്ന കഴിവുകെട്ട സർക്കാർ കേസ് എഴുതിത്തള്ളാതെ, ഉപദ്രവിക്കുകയെന്ന ലക്ഷ്യത്തോടെയാണ് ഇപ്പോൾ സിബിഐക്കു വിടുന്നതെന്നും ഉമ്മൻ ചാണ്ടി പറഞ്ഞു.
