ഇടുക്കി : കേരളത്തിൽ നൂറ്റാണ്ടുകളോളം ഇരുണ്ടയുഗം ഉണ്ടായിരുന്നുവെന്നാണ് കാലങ്ങളായി ചില ചരിത്രഗവേഷകർ പറയുന്നത്. എന്നാൽ, അത് ഗവേഷണത്തിന്റെ പോരായ്മയാണെന്നാണ് പുതിയ ചില കണ്ടെത്തലുകൾ തെളിയിക്കുന്നത്. കഴിഞ്ഞ ദിവസങ്ങളിൽ ഇടുക്കിയിലെ ചെല്ലാർകോവിൽ മയിലാടുംപാറയിൽ നിന്ന് കണ്ടെടുത്ത ചില പുരാതന വസ്തുക്കൾ, ഇടുക്കിയിൽ സിന്ധു നദീതട സംസ്കാരത്തോളം പഴക്കമുള്ള സംസ്കാരം നിലനിന്നിരുന്നുവെന്നതിന് തെളിവാണെന്ന് ഗവേഷകർ അവകാശപ്പെടുന്നു. ചെല്ലാർകോവിൽ മയിലാടുംപാറയിൽ നിന്നും കഴിഞ്ഞ ദിവസം കണ്ടെടുത്ത നന്നങ്ങാടികൾക്ക് സിന്ധുനദീതട സംസ്കാര കാലത്തോളം പഴക്കമുണ്ടെന്നാണ് കണ്ടെത്താൽ. നെടുംങ്കണ്ടം പുരാവസ്തു ചരിത്ര സംരക്ഷണ സമിതി ഗവേഷകൻ രാജീവ് പുലിയൂരിന്റെ നേതൃത്വത്തിൽ നടത്തിയ പരിശോധനയിൽ ആണ് ലഭിച്ചവസ്തുകൾക്ക് ചരിത്രവുമായി ബന്ധമുണ്ടെന്ന് മനസിലായത്.
ചെല്ലാർകോവിൽ മയിലാടുംപാറ ക്ഷേത്രത്തിന് സമീപത്തെ കമ്പിയിൽ ബിനോയിയുടെ പുരയിടത്തിൽ മീൻ വളർത്തലിനായി ജലസംഭരണി ഒരുക്കാനായി JCB ഉപയോഗിച്ച് കുഴിയെടുക്കുമ്പോഴാണ് മണ്ണിനടിയിൽ നിന്നും 2 ഭീമൻ നന്നങ്ങാടികൾ കണ്ടെത്തിയത്. കൂടെ രണ്ട് ചെറു കുടങ്ങളും ഉണ്ടായിരുന്നു. ഈ നന്നങ്ങാടികളിൽ എല്ലിൻ കഷണങ്ങൾ,ചെറുപാത്രങ്ങൾ, ധാന്യങ്ങളുടെ ദ്രവിച്ച അവശിഷ്ടങ്ങൾ, ഇരുമ്പ് കൊണ്ടുള്ള ആയുധങ്ങൾ, വിലയേറിയ ആഭരണാവശിഷ്ടങ്ങൾ എന്നിവയും കണ്ടെത്തി.
മുൻകാലങ്ങളിൽ മൃതദേഹം അടക്കം ചെയ്യുന്നതിനായി ഉപയോഗിച്ചിരുന്ന വലിയ മൺപാത്രമാണ് നന്നങ്ങാടി. ചാറ എന്ന പേരിലും ഇത് അറിയപ്പെടുന്നു. ഇവയുടെ കാലപ്പഴക്കം 2500 വർഷങ്ങൾ അതായത് BC 500-1500 കാലഘട്ടത്തിലോ ആകാമെന്ന് കരുതപ്പെടുന്നു. കൂടുതൽ ശാസ്ത്രീയ പഠനങ്ങളിലൂടെ കൂടുതൽ വ്യക്തത വരുമെന്നും ഗവേഷകർ പറയുന്നു.
കണ്ടെത്തിയ നന്നങ്ങാടികളിൽ നിന്നും കണ്ടെടുത്ത മെസപൊട്ടമിയൻ- സിന്ധു നദീതട നാഗരീകതയിലെ രാജാക്കന്മാർ ധരിച്ചിരിക്കുന്ന കൊത്തുപണിയുള്ള ആഭരണങ്ങളാണെന്നാണ് വെളിപ്പെടുത്തൽ. എച്ച്ഡ് കാർണെലിയം ബീഡ്‌സ് ആഭരണങ്ങൾ ആണ് ലഭിച്ചിട്ടുള്ളത്. ലാവാ കല്ലുകൾ അല്ലെങ്കിൽ ഇരുമ്പ് ചൂടാക്കി അത് ലാവയാകുന്ന സന്ദർഭത്തിൽ തന്നെ പെട്ടെന്ന് അവസാനിപ്പിച്ച് അതീവ സങ്കീർണ നിർമ്മാണപ്രക്രിയയിലൂടെ രൂപപ്പെടുത്തുന്നവയാണീ ആഭരണങ്ങളിലെ മുത്തുകൾ. കോടികൾ വിലമതിക്കുന്ന ഇവ ചരിത്രത്തിലെ നിഗൂഢതകൾ തേടിയുള്ള യാത്രയിൽ വലിയൊരു സഹായകമാവും എന്നാണ് ഗവേഷകർ പറയുന്നത്.
