ആലപ്പുഴ: നീണ്ട കാത്തിരിപ്പിനൊടുവിൽ ആലപ്പുഴ ബൈപ്പാസ് ഇന്ന് ഗതാഗതത്തിനായി തുറക്കും. ജനങ്ങളുടെ സ്വപ്നമായ ആലപ്പുഴ ബൈപ്പാസ് കേന്ദ്ര ഉപരിതല ഗതാഗത മന്ത്രി നിതിൻ ഗഡ്ഗരിയും മുഖ്യമന്ത്രി പിണറായി വിജയനും ചേര്ന്ന് നാടിന് സമര്പ്പിച്ചു. ഓൺലൈനായാണ് ഗവർണർ ആരിഫ് മുഹമ്മദ് ഖാൻ മുഖ്യാതിഥിയായി പങ്കെടുക്കുന്നത്. കേന്ദ്ര സഹമന്ത്രിമാരായ വി.കെ.സിങ്, വി.മുരളീധരൻ, മന്ത്രിമാരായ തോമസ് ഐസക്, പി.തിലോത്തമൻ, എ.എം.ആരിഫ് എംഎംപി, നഗരസഭാധ്യക്ഷ സൗമ്യ രാജ് തുടങ്ങിയവർ പങ്കെടുക്കും. ഉദ്ഘാടന സ്ഥലത്ത് 500 പേർക്ക് ഇരിക്കാവുന്ന വിശാലമായ പന്തലാണ് ഒരുക്കിയിട്ടുള്ളത്.
ദേശീയപാത 66-ല് കളര്കോടുമുതല് കൊമ്മാടിവരെ 6.8 കിലോമീറ്ററിലാണ് ബൈപ്പാസ്. ഇതില് അപ്രോച്ച് റോഡ് ഉള്പ്പെടെ 4.8 കിലോമീറ്റര് എലിവേറ്റഡ് ഹൈവേയാണ്. മേല്പ്പാലംമാത്രം 3.2 കി.മീ. വരും. കേരളത്തിലെ ഏറ്റവും വലുതും കടല്ത്തീരത്തിനുമുകളിലൂടെ പോകുന്നതുമായ ആദ്യ എലിവേറ്റഡ് ഹൈവേയും ഇതാണ്. ദേശീയപാതയിലൂടെ തെക്കോട്ടും വടക്കോട്ടും പോകുന്ന വാഹനങ്ങള്ക്ക് ഇനി ആലപ്പുഴ നഗരത്തിലെത്താതെ എളുപ്പത്തില് യാത്രചെയ്യാം.കേന്ദ്രസര്ക്കാര് 174 കോടിയും സംസ്ഥാന പൊതുമരാമത്ത് വകുപ്പ് 174 കോടിയും ചെലവഴിച്ചാണ് പദ്ധതി യാഥാര്ഥ്യമാക്കിയത്.1990ലാണ് ബൈപ്പാസ് നിര്മാണം ആരംഭിച്ചത്. പല കാരണങ്ങളാല് പണി നീളുകയായിരുന്നു. 35 വര്ഷം കൊണ്ട് ബൈപാസ് നിര്മാണത്തിന്റെ 20 ശതമാനമാണ് തീര്ന്നതെങ്കില് 5 കൊല്ലം കൊണ്ടാണ് ബൈപാസ് നിര്മാണം 100 ശതമാനം പൂര്ത്തിയായതെന്ന് മന്ത്രി തോമസ് ഐസക് പറഞ്ഞു.
