പാപ്പന്റെ വിജയത്തിന് ശേഷം സുരേഷ് ഗോപി പ്രധാനവേഷത്തിലെത്തുന്ന ജിബു ജേക്കബ് ചിത്രം മേ ഹൂം മൂസയുടെ നിര്‍മാണ പ്രവര്‍ത്തനങ്ങള്‍ പൂര്‍ത്തിയായി വരുന്നു. കോണ്‍ഫിഡന്റ് ഗ്രൂപ്പ് ആന്‍ഡ് തോമസ് തിരുവല്ലാ ഫിലിംസിന്റെ ബാനറില്‍ ഡോ. സി.ജെ. റോയ്, തോമസ് തിരുവല്ല എന്നിവരാണ് ഈ ചിത്രം നിര്‍മിക്കുന്നത്.
ഇന്ത്യന്‍ ആര്‍മിയിലെ അംഗമായ മലപ്പുറം പൊന്നാനിക്കാരനായ മൂസ എന്ന കഥാപാത്രത്തെയാണ് ഈ ചിത്രത്തില്‍ സുരേഷ് ഗോപി അവതരിപ്പിക്കുന്നത്. സുരേഷ് ഗോപിയില്‍ നിന്നും പ്രേക്ഷകര്‍ ഇതുവരെ കാണാത്ത കഥാപാത്രമായിരിക്കും മൂസയെന്ന് സംവിധായകനായ ജിബു ജേക്കബ് പറയുന്നു.
വലിയ മുതല്‍മുടക്കില്‍ എത്തുന്ന ചിത്രം ഇന്ത്യയിലെ വ്യത്യസ്ത ലൊക്കേഷനുകളിലാണ് ചിത്രീകരിച്ചിരിക്കുന്നത്. പൂനം ബജ്വാ, അശ്വിനി റെഡ്ഢി, സൈജു കുറുപ്പ് , ഹരീഷ്‌കണാരന്‍, ജോണി ആന്റണി, മേജര്‍ രവി, മിഥുന്‍ രമേശ്, ശരണ്‍, ശ്രിന്ദ, ശശാങ്കന്‍ മയ്യനാട് എന്നിവരും പ്രധാന താരങ്ങളാണ്. ഇവര്‍ക്കൊപ്പം നിരവധി പുതുമുഖങ്ങളും ഈ ചിത്രത്തില്‍ അഭിനയിക്കുന്നു.
രചന രൂപേഷ് റെയ്ന്‍. റഫീഖ് അഹമ്മദ്, ഹരി നാരായണന്‍, സജാദ് എന്നിവരുടെ വരികള്‍ക്ക് ശ്രീനാഥ് ശിവശങ്കരന്‍ ഈണം പകര്‍ന്നിരിക്കുന്നു. വിഷ്ണു ശര്‍മ ഛായാഗ്രഹണവും സൂരജ് ഈ.എസ്. എഡിറ്റിങും നിര്‍വ്വഹിക്കുന്നു. കലാസംവിധാനം സജിത് ശിവഗംഗ. മേക്കപ്പ് പ്രദീപ് രംഗന്‍. സെന്‍ട്രല്‍ പിക്‌ച്ചേഴ്‌സ് ചിത്രം പ്രദര്‍ശനത്തിനെത്തിക്കുന്നു.
