പാലാ: എംജി സർവകലാശാല അത്ലറ്റിക് ചാമ്പ്യൻഷിപ്പിൽ 19 ഇനങ്ങൾകൂടി പൂർത്തിയായപ്പോൾ വനിതാവിഭാഗത്തിൽ പാലാ അൽഫോൻസയും പുരുഷവിഭാഗത്തിൽ കോതമംഗലം എംഎ കോളേജും മുന്നിലെത്തി.
റെക്കോഡുകൾ ഒഴിഞ്ഞ രണ്ടാംദിനം നിലവിലെ ചാമ്പ്യന്മാരായ എംഎ കോളേജ് എട്ട് സ്വർണമടക്കം 100 പോയിന്റ് നേടി. വനിതാ വിഭാഗത്തിൽ കഴിഞ്ഞ തവണത്തെ രണ്ടാം സ്ഥാനക്കാരായ പാലാ അൽഫോൻസാ നാല് സ്വർണമടക്കം 72 പോയിന്റ് നേടിയാണ് മുന്നിലെത്തിയത്.
ഈ വിഭാഗത്തിൽ നിലവിലുള്ള ചാമ്പ്യൻമാരായ എംഎ കോളേജ് നാല് സ്വർണമുൾപ്പെടെ 69 പോയിന്റുമായി തൊട്ടുപിന്നിലുണ്ട്. പുരുഷവിഭാഗത്തിൽ കാഞ്ഞിരപ്പള്ളി സെന്റ് ഡൊമിനിക്സ് 45 പോയിന്റുമായി രണ്ടാമതാണ്. ചങ്ങനാശേരി എസ്ബി കോളേജ് 43 പോയിന്റുമായി മൂന്നാം സ്ഥാനത്തും പാലാ സെന്റ് തോമസ് കോളേജ് 17 പോയിന്റുമായി നാലാമതുമാണ്.
വനിതാവിഭാഗത്തിൽ ചങ്ങനാശേരി അസംപ്ഷൻ കോളേജാണ് മൂന്നാമത്, 34 പോയിന്റ്. എറണാകുളം മഹാരാജാസ് കോളേജ് 13 പോയിന്റുമായി നാലാം സ്ഥാനത്തുണ്ട്.
