മലപ്പുറം: കല്ലിങ്ങാമ്പറമ്പ് എംഎസ്എംഎസ് ഹയർ സെക്കൻഡറി സ്കൂൾ വിദ്യാർഥിയാണ് അപകടത്തിൽപ്പെട്ടത്. തിങ്കളാഴ്ച വൈകിട്ട് വളയന്നൂരിലായിരുന്നു സംഭവം. അപകടത്തിന്റെ സിസിടിവി ദൃശ്യങ്ങൾ പുറത്തുവന്നു.
സ്കൂൾ വിട്ടശേഷം വിദ്യാർഥികളുമായി പോകുമ്പോഴാണ് അപകടമുണ്ടായത്. വളവു തിരിയുന്നതിനിടെ ബസിന്റെ പിന്നിലെ വാതിൽ തുറന്ന് വിദ്യാർഥി തെറിച്ചു വീഴുകയായിരുന്നു. വിദ്യാർഥി വീണതറിയാതെ ബസ് മുന്നോട്ട് നീങ്ങുന്നത് സിസിടിവി ദൃശ്യങ്ങളിൽ കാണാം.
ബസിന്റെ പിന്നാലെ കാർ ഉൾപ്പെടെ ഉണ്ടായിരുന്നെങ്കിലും, തെറിച്ചുവീണത് റോഡിന്റെ അരികിലേക്കായതിനാൽ ചെറിയ പരുക്കുകളോടെ വിദ്യാർഥി രക്ഷപെട്ടു. കോട്ടയ്ക്കലിലെ സ്വകാര്യ ആശുപത്രിയിൽ പ്രവേശിപ്പിച്ച വിദ്യാർഥിയെ പ്രാഥമിക ചികിത്സയ്ക്കു ശേഷം വിട്ടയച്ചു.
ഓടുന്ന ബസിന്റെ ഡോർ തുറന്നത് എങ്ങനെയെന്ന കാര്യത്തിൽ വ്യക്തത വന്നിട്ടില്ല. അബദ്ധത്തിൽ വാതിൽ തുറന്ന് പുറത്തു വീണതാണെന്നാണ് പ്രാഥമിക നിഗമനം.
