കൊല്ക്കത്ത: ബംഗാളിന് 1000 കോടി രൂപയുടെ അടിയന്തര ധനസഹായം പ്രധാനമന്ത്രി നരേന്ദ്ര മോദി പ്രഖ്യാപിച്ചു. ചുഴലിക്കാറ്റില് മരണപ്പെട്ടവരുടെ കുടുംബത്തിന് 2 ലക്ഷം രൂപ വീതവും ഗുരുതരമായി പരിക്കേറ്റവര്ക്ക് 50,000 രൂപ വീതവും നല്കുമെന്നും പ്രധാനമന്ത്രി വ്യക്തമാക്കി. ദുരന്തമേഖല സന്ദര്ശിച്ച ശേഷം നടത്തിയ അവലോകന യോഗത്തിലാണ് പ്രധാനമന്ത്രി ധനസഹായം പ്രഖ്യാപിച്ചത്.
ചുഴലിക്കാറ്റില് കനത്ത നാശനഷ്ടങ്ങള് സംഭവിച്ച മേഖലകള് മോദി ഹെലികോപ്ടറില് വിലയിരുത്തി. ശേഷം ബസിര്ഹത്ത് മേഖലയ്ക്ക് സമീപത്തെ സ്കൂളില് അവലോകന യോഗം ചേര്ന്നു. ഉംപുന് ചുഴലിക്കാറ്റില് സംസ്ഥാനത്ത് കനത്ത നാശനഷ്ടങ്ങള് സംഭവിച്ചെന്നും 80 പേര്ക്ക് ജീവന് നഷ്ടമായെന്നും മമത ബാനര്ജി പ്രധാനമന്ത്രിയെ അറിയിച്ചു.
സംസ്ഥാനത്തെ ജനങ്ങളുടെ ജീവിതം സാധാരണനിലയിലേക്കെത്തിക്കാന് സാധ്യമായതെല്ലാം ചെയ്യുമെന്ന് യോഗത്തിനുശേഷം പ്രധാനമന്ത്രി മാധ്യമങ്ങളോട് പറഞ്ഞു. പരീക്ഷണത്തിന്റെ ഈ ഘട്ടത്തില് കേന്ദ്രസര്ക്കാര് ബംഗാളിനൊപ്പം നില്ക്കുമെന്നും അദ്ദേഹം മാധ്യമങ്ങള്ക്കുള്ള പ്രസ്താവനയില് കൂട്ടിച്ചേര്ത്തു. എന്നാല് ഉംപുന് ചുഴലിക്കാറ്റിനെ ദേശീയദുരന്തമായി പ്രഖ്യാപിക്കണമെന്ന മമത ബാനര്ജിയുടെ ആവശ്യത്തെക്കുറിച്ച് പ്രധാനമന്ത്രി ഒന്നും പ്രതികരിച്ചില്ല.
ഉംപുന് ചുഴലിക്കാറ്റ് ബംഗാളിനെ തകര്ത്തിട്ടും കേന്ദ്രത്തില്നിന്ന് ഒരു സഹായവും ലഭിച്ചിട്ടില്ലെന്ന് മമത നേരത്തെ പരാതി ഉന്നയിച്ചിരുന്നു. ദുരന്തമുണ്ടാവുമ്പോഴാണ് സഹായം നല്കേണ്ടത്, അല്ലാതെ 500 ദിവസം കഴിഞ്ഞിട്ടല്ല, പ്രധാനമന്ത്രി സംസ്ഥാനം സന്ദര്ശിക്കണമെന്നും മമത ആവശ്യപ്പെട്ടിരുന്നു.
