കൊച്ചി: ഏഴ് വർഷത്തെ ഇടവേളയ്ക്കു ശേഷം ക്രിക്കറ്റ് മൈതാനത്തേയ്ക്ക് തിരികെയെത്താൻ ക്രിക്കറ്റ് താരം എസ്. ശ്രീശാന്ത്. ഐ പി എൽ മാതൃകയിൽ കേരള ക്രിക്കറ്റ് അസോസിയേഷൻ (കെസിഎ) സംഘടിപ്പിക്കുന്ന ട്വന്റി20 ലീഗിലൂടെയാണ് മുൻ ഇന്ത്യൻ താരത്തിന്റെ ഔദ്യോഗിക മടങ്ങിവരവ്. ഐപിഎൽ ഒത്തുകളിക്കേസുമായി ബന്ധപ്പെട്ട് ശ്രീശാന്തിന് ബിസിസിഐ ഏർപ്പെടുത്തിയിരുന്ന 7 വർഷത്തെ വിലക്കിന്റെ കാലാവധി ഈ വർഷം സെപ്റ്റംബർ 13ന് അവസാനിച്ചിരുന്നു. ആഭ്യന്തര സീസണിലെ മത്സരങ്ങൾ സംബന്ധിച്ച അനിശ്ചിതത്വം തുടരുന്ന സാഹചര്യത്തിലാണ് സ്വന്തം പ്രീമിയർ ലീഗ് തുടങ്ങാൻ കെസിഎ ജനറൽ ബോഡി യോഗം കഴിഞ്ഞ മാസം തീരുമാനിച്ചത്. കേരളത്തിലെ റജിസ്റ്റേഡ് താരങ്ങളെ 6 ടീമുകളാക്കി തിരിച്ച് ആലപ്പുഴ എസ്ഡി കോളജ്– കെസിഎ സ്റ്റേഡിയത്തിൽ മത്സരം നടത്താനാണ് പദ്ധതി, എന്നാൽ മത്സരത്തിന്റെ തീയതി സംബന്ധിച്ച് അന്തിമ തീരുമാനമായിട്ടില്ല.
ശ്രീശാന്ത് കേരള പ്രീമിയർ ലീഗിലൂടെ തിരികെയെത്തുമെന്ന വിവരം കെസിഎ പ്രസിഡന്റ് സാജൻ കെ.വർഗീസ് തന്നെയാണ് സ്ഥിരീകരിച്ചത്. ‘തീർച്ചയായും ശ്രീശാന്ത് തന്നെയായിരിക്കും ലീഗിന്റെ പ്രധാന ആകർഷണം. മുഴുവൻ താരങ്ങളും ആലപ്പുഴയിലെ ഒരു ഹോട്ടലിൽ ബയോ ബബിളിലായിരിക്കും. ഡിസംബർ ആദ്യവാരം ആരംഭിക്കാനാണ് ശ്രമം. സംസ്ഥാന സർക്കാരിന്റെ അനുമതിയാണ് പ്രധാനം.’ – സാജൻ പറഞ്ഞു.
