പാലായ്ക്കടുത്ത് ചേർപ്പുങ്കലിൽ 60 ഏക്കർ പാടശേഖരത്ത് നിലമുഴുതുവാനായി എത്തിയ ട്രാക്ടറിന്റെ എൻജിനിൽ ഉപ്പ് കല്ല് വിതറിയ
പ്രതിയെ കിടങ്ങൂർ പോലീസ് അറസ്റ്റ് ചെയ്തു. ചേർപ്പുങ്കൽ കുമ്മണ്ണാറത്ത് കുഞ്ഞുമോനെ (65) ആണ് കിടങ്ങൂർ പൊലീസ് പിടികൂടിയത്.
കഴിഞ്ഞ 15 ന് വാഴേപീടികയിൽ മാത്തുക്കുട്ടി തോമസിന്റെ 60 ഏക്കർ പാടശേഖരത്തിൽ നെൽകൃഷിയ്ക്കായി എത്തിച്ച ട്രാക്ടറിന്റെ എയർഫിൽട്ടറിലാണ് മൂന്ന് കിലോയോളം ഉപ്പ്കല്ലിട്ട് നിറച്ചത്.
പാടത്ത് ഉഴവ് നടക്കുന്നിതിനിടെയാണ് ഇയാൾ ട്രാക്ടറിൽ ഉപ്പിട്ടത്. ട്രാക്ടർ സ്റ്റാർട്ടാകാതെ വന്നതിനെ തുടർന്നാണ് ഉപ്പുകല്ല് നിറച്ചതായി കണ്ടത്. തുടർന്ന് കിടങ്ങൂർ പൊലീസിൽ പരാതി നൽകി.
ക്ഷീരകർഷകനാണ് പിടിയിലായ കുഞ്ഞുമോൻ. പാടശേഖരം പൂർണ്ണമായും നെൽകൃഷിയ്ക്കായി ഉഴുത് മറിക്കുന്നതിനെ തുടർന്ന് ആട്, പശു, പോത്ത് തുടങ്ങിയ വളർത്തുമൃഗങ്ങൾക്കുള്ള പുല്ല് ലഭിക്കാതെയാകുമെന്ന ആശങ്കയെ തുടർന്നാണ് ട്രാക്ടറിൽ ഉപ്പിട്ടതെന്ന് ഇയാൾ പൊലീസിനോട് പറഞ്ഞു.
ട്രാക്ടറിന്റെ അറ്റകുറ്റപ്പണികൾക്കായുള്ള നഷ്ടപരിഹാരമായി 11000 രൂപ കുഞ്ഞുമോൻ മാത്തുക്കുട്ടിയ്ക്ക് നൽകണമെന്ന നിബന്ധനയിൽ എസ്.ഐയുടെ സാന്നിദ്ധ്യത്തിൽ കേസ് ഒത്തുതീർപ്പിലാക്കി.
കേസിൽ ശക്തമായ സമ്മർദ്ദം പോലീസ് നേരിട്ടിരുന്നു. വിവിധ രാഷ്ട്രീയ കക്ഷി നേതാക്കൾ സ്ഥലം സന്ദർശിക്കുകയും കർഷകന്
പിന്തുണ അറിയിക്കുകയും ചെയ്തിരുന്നു.
