കോട്ടയം ജില്ലയില്‍ തീരുമാനിച്ച പരിപാടികളിലെല്ലാം പങ്കെടുക്കാന്‍ തന്നെയാണ് തീരുമാനമെന്ന് ശശി തരൂര്‍ എംപി വ്യക്തമാക്കി. പരിപാടികളില്‍ ആര് വന്നാലും ആര്‍ക്ക് അസൗകര്യമുണ്ടായാലും തനിക്ക് പ്രശ്‌നമില്ലെന്നും അദ്ദേഹം പറഞ്ഞു.
തരൂര്‍ പങ്കെടുക്കുന്ന പരിപാടിയെക്കുറിച്ച് അദ്ദേഹത്തിന്റെ ഓഫീസോ യൂത്ത് കോണ്‍ഗ്രസോ തനിക്ക് യാതൊരുവിധ അറിയിപ്പും നല്‍കിയിട്ടില്ലെന്നാണ് ഡിസിസി പ്രസിഡന്റ് നാട്ടകം സുരേഷ് പറയുന്നത്. ഇത് സംബന്ധിച്ച് നേതൃത്വത്തിന് പരാതി നല്‍കാനുള്ള നീക്കത്തിലാണ് ഡിസിസി.
എന്നാല്‍ പരിപാടി നടത്തുന്ന വിവരം ഡിസിസിയെ അറിയിക്കേണ്ടത് യൂത്ത് കോണ്‍ഗ്രസ് ആണെന്ന് നിലപാടിലാണ് തരൂര്‍. തങ്ങളോട് കാര്യങ്ങള്‍ വ്യക്തമായി പറഞ്ഞത് പോലെ ഡിസിസിയോടും യൂത്ത് കോണ്‍ഗ്രസ് പറഞ്ഞിട്ടുണ്ടാവും എന്ന് തരൂര്‍ പറഞ്ഞു.
ശശി തരൂർ എംപി ഇന്ന് ഈരാറ്റുപേട്ടയിൽ
ഇന്ന് വൈകീട്ട് ജില്ലയിലെത്തുന്ന തരൂര്‍ പാല, കാഞ്ഞിരപ്പള്ളി രൂപത അധ്യക്ഷന്മാരെ കാണും. കെ.എം ചാണ്ടി അനുസ്മരണത്തിലും പങ്കെടുക്കും. ഇന്ന് വൈകുന്നേരം 5.30ന് ഈരാറ്റുപേട്ട തെക്കേക്കരയിൽ ശശി തരൂർ എത്തും. തുടർന്ന് പ്രവർത്തകരുടെയും പൊതുജനങ്ങളുടെയും അകമ്പടിയോടെ മുട്ടം ജംഗ്ഷനിലെ വേദിയിൽ എത്തും.
