പാലാ - തൊടുപുഴ റോഡിൽ പ്രവിത്താനം ടൗണിന് സമീപം ടിപ്പർ ലോറിയിടിച്ച് ബൈക്ക് യാത്രികനായ യുവാവ് മരിച്ചു. പ്രവിത്താനം പനന്താനത്ത് കൊരംകുത്തീമാക്കൽ ഹർഷൽ ബിജു (22) ആണ് മരിച്ചത്.
ടിപ്പർ ദേഹത്തുകൂടി കയറിയിറങ്ങി ഹർഷൽ സംഭവസ്ഥലത്ത് തന്നെ മരിച്ചു. പാലാ കല്ലറയ്ക്കൽ ഹോം അപ്ലയൻസസ് ജീവനക്കാരനായിരുന്നു ഹർഷൽ.
രാവിലെ 9.30 ഓടെ പ്രവിത്താനം ചൂണ്ടച്ചേരി റോഡിലായിരുന്നു അപകടം. ടിപ്പറിന്റെ പിന്നാലെ എത്തിയ വാഹനം ഓവർടേക്ക് ചെയ്യാൻ ശ്രമിക്കുന്നതിനിടെ എതിരെ വന്ന യുവാവ് ബൈക്ക് വെട്ടിക്കുകയായിരുന്നു.
റോഡിലേയ്ക്ക് വീണ ഹർഷലിന്റെ ദേഹത്തുകൂടി ടിപ്പർ കയറിയിറങ്ങി. പാലാ പോലീസ് സ്ഥലത്തെത്തി മേൽനടപടികൾ സ്വീകരിച്ചു. മൃതദ്ദേഹം പാലാ ജനറൽ ആശുപത്രിയിലേയ്ക്ക് മാറ്റി.
