ഓർമകളിലേക്കുള്ള യാത്രകൾ ആണ് ഓരോ ഫോട്ടോകളും. വർഷങ്ങൾക്കപ്പുറമുള്ള ഓരോ ഫോട്ടോകൾക്കും പറയാനുണ്ടാകും ഒരുപാട് കഥകൾ. പഴയ ഒരു സിനിമയുടെ ലൊക്കേഷൻ ചിത്രമാണ് ഇപ്പോൾ സമൂഹമാധ്യമങ്ങളിൽ വൈറൽ ആവുന്നത്.
മലയാളസിനിമയിലെ എക്കാലത്തെയും മികച്ച കൂട്ടുക്കെട്ടുകളിലൊന്നായ മോഹൻലാലും ശ്രീനിവാസനുമാണ് ചിത്രത്തിൽ നിറയുന്നത്. 1990ൽ പുറത്തിറങ്ങിയ, പ്രിയദർശൻ സംവിധാനം ചെയ്ത 'അക്കരെയക്കരെയക്കരെ' എന്ന സിനിമയുടെ ഷൂട്ടിംഗ് ലൊക്കേഷനിൽ നിന്നുള്ളതാണ് ഈ ചിത്രം. ഛായാഗ്രാഹകൻ S കുമാറിനെയും ചിത്രത്തിൽ കാണാം.
സത്യൻ അന്തിക്കാട് സംവിധാനം ചെയ്ത 'നാടോടിക്കാറ്റ്' , 'പട്ടണപ്രവേശം' എന്നീ ചിത്രങ്ങളടങ്ങുന്ന പരമ്പരയിലെ മൂന്നാമത്തെ ചിത്രമായിരുന്നു 'അക്കരെയക്കരെയക്കരെ'. ശ്രീനിവാസൻ രചന നിർവഹിച്ച് പ്രിയദർശൻ സംവിധാനം ചെയ്ത ഈ ചിത്രം നിർമ്മിച്ചത് G P ഫിലിംസിന്റെ ബാനറിൽ G P വിജയകുമാറാണ്.
മ്യൂസിയത്തിൽ നിന്ന് മോഷണം പോയ സ്വർണകിരീടത്തിനെ പറ്റിയുള്ള അന്വേഷണത്തിനായി ദാസനും വിജയനും അമേരിക്കയിലേക്ക് പോകുന്നതും അവിടെ വെച്ചുണ്ടാകുന്ന സംഭവവികാസങ്ങളുമാണ് സിനിമയിലുള്ളത്. ദാസനായി മോഹൻലാലും വിജയമായി ശ്രീനിവാസനും വേഷമിട്ട സിനിമയിൽ മുകേഷ്, മണിയൻപിള്ള രാജു, സോമൻ, പാർവ്വതി, നെടുമുടി വേണു എന്നിവരും പ്രധാന വേഷങ്ങളിലെത്തിയിരുന്നു.
