ദേശീയപാതയിലെ കുഴിയടയ്ക്കലിൽ അടിയന്തിര ഇടപെടൽ നടത്തി കോടതി

കൊച്ചി: ദേശീയപാതയിലെ അശാസ്ത്രീയ കുഴിയടക്കലിൽ ഹൈക്കോടതിയുടെ അടിയന്തര ഇടപെടൽ. വിഷയത്തിൽ അടിയന്തരമായി ഇടപെടാൻ സർക്കാർ അഭിഭാഷകർക്ക് കോടതി നിർദ്ദേശം നൽകി. 

ടാർ പാക്കറ്റിലാക്കി കൈകോട്ട് ഉപയോഗിച്ച് ദേശീയപാതയിലെ കുഴിയടക്കുന്ന വാർത്തകൾ വന്നിരുന്നു. ഇതിന് പിന്നാലെയാണ് ഹൈക്കോടതിയുടെ ഇടപെടൽ ഉണ്ടായിരിക്കുന്നത്.

എറണാകുളം, തൃശ്ശൂർ ജില്ലകളിലെ കളക്ടർമാരോ അല്ലെങ്കിൽ അവർ ചുമതലപ്പെടുത്തുന്ന ഏറ്റവും പ്രധാനപ്പെട്ട ഉദ്യോഗസ്ഥരോ ദേശീയപാതയിലെ കുഴി അടക്കുന്ന സ്ഥലങ്ങൾ പരിശോധിച്ച് റിപ്പോർട്ട് കോടതിക്ക് കൈമാറാനാണ് ജസ്റ്റിസ് ദേവൻ രാമചന്ദ്രൻ നിർദ്ദേശം നൽകിയിരിക്കുന്നത്.

റോഡിലെ കുഴി അടക്കുന്നതിൽ വീഴ്ചകൾ  വരുന്ന സാഹചര്യത്തിലാണ് കോടതി വീണ്ടും അടിയന്തര ഇടപെടൽ നടത്തിയിരിക്കുന്നത്. ജില്ലാ കളക്ടർമാരോട് റോഡിൽ ഇറങ്ങി പരിശോധിച്ച് റിപ്പോർട്ട് സമർപ്പിക്കാനാണ് ഹൈക്കോടതി നിർദ്ദേശിച്ചിരിക്കുന്നത്. റിപ്പോർട്ടിന്റെ അടിസ്ഥാനത്തിൽ തുടർ നടപടികൾ സ്വീകരിക്കണമെന്നും കോടതി നിർദ്ദേശിച്ചു.