കോട്ടയം: ഇന്ത്യൻ രാഷ്ട്രീയത്തിലെ സജീവ സാന്നിദ്ധ്യവും ദീർഘകാലം കേന്ദ്രമന്ത്രിയുമായിരുന്ന രാം വിലാസ് പസ്വാന്റെ സ്മരണാർത്ഥം കേരളത്തിലെ ഏറ്റവും മികച്ച എംഎൽഎക്ക് നൽകുന്ന ഈ വർഷത്തെ പുരസ്കാരത്തിന് മോൻസ് ജോസഫ് എംഎൽഎയെ തിരഞ്ഞെടുത്തതായി ലോക് ബന്ധു രാജ് നാരായൺജി ഫൗണ്ടേഷൻ ഭാരവാഹികൾ അറിയിച്ചു .
അവാർഡ് ജേതാവിന് പുരസ്കാരമായി 25000/- രൂപയും പ്രശസ്തി പത്രവുമാണ് സമ്മാനിക്കുന്നത്. വിവിധ മേഖലകളിൽ കഴിവ് തെളിയിച്ച പ്രഗത്ഭരായ വ്യക്തികൾക്കും മാതൃക ജനപ്രതിനിധികൾക്കും ഇതോടൊപ്പം പുരസ്കാരം സമ്മാനിക്കാനും തീരുമാനിച്ചിട്ടുണ്ട്.
അവാർഡ്ദാന സമ്മേളനം ഒക്ടോബർ 8-ാം തീയതി വൈകുന്നേരം 5 മണിക്ക് തിരുവനന്തപുരം റീജൻസി ഹോട്ടൽ ഓഡിറ്റോറിയത്തിൽ ഗതാഗത വകുപ്പ് മന്ത്രി അഡ്വ. ആന്റണി രാജു ഉദ്ഘാടനം ചെയ്യുന്നതാണ്. ഫൗണ്ടേഷൻ ചെയർമാൻ മുഹമ്മദ് ആസിഫ് അധ്യക്ഷത വഹിക്കുന്ന ചടങ്ങിൽ മുൻമന്ത്രി പന്തളം സുധാകരൻ മുഖ്യപ്രഭാഷണം നടത്തും.
വിവിധ രംഗങ്ങളിൽ കഴിവ് തെളിയിച്ച പ്രഗത്ഭരെയും മാതൃക ജനപ്രതിനിധികളെയും ഇതോടൊപ്പം ചടങ്ങിൽ ആദരിക്കുമെന്ന് ഫൗണ്ടേഷൻ സ്റ്റേറ്റ് കോർഡിനേറ്റർ അഡ്വ ഹാഷിർ ലബ്ബ, ദുനിംസ് പേഴുംമൂട് എന്നിവർ അറിയിച്ചു.
