കോട്ടയം: മണിപ്പൂരിൽ നടക്കുന്ന കലാപത്തിൽ കേന്ദ്ര സർക്കാർ സ്വീകരിക്കുന്ന സമീപനത്തിൽ പ്രതിഷേധിച്ച് എൽഡിഎഫിന്റെ നേതൃത്വത്തിൽ നടത്തുന്ന സമരങ്ങളിൽ മുഴുവൻ ജനാധിപത്യ വിശ്വാസികളും അണിനിരക്കണമെന്ന് ജനാധിപത്യ കേരള കോൺഗ്രസ്‌ സ്റ്റേറ്റ് എക്സിക്യൂട്ടീവ് മെമ്പർ സന്തോഷ് കുഴിവേലിൽ.ജനങ്ങൾക്കിടയിൽ ഭിന്നത വളർത്തുന്ന ബിജെപിയുടെ നയ സമീപനത്തിന്റെ അനന്തര ഫലമാണ് മണിപ്പൂരിൽ നടക്കുന്നതെന്ന് സന്തോഷ് കുഴിവേലിൽ കുറ്റപ്പെടുത്തി.
ബിജെപി മുന്നോട്ടുവയ്ക്കുന്ന ധ്രുവീകരണ രാഷ്ട്രീയ നാടകമാണ് കുക്കികളും മെയ്തികളും തമ്മിലുള്ള കലാപം. ആയിരക്കണക്കിന് പേർ അഭയാർത്ഥികളായി കഴിയുന്ന കലാപത്തിൽ നിരവധി ക്രിസ്ത്യൻ പള്ളികളടക്കം തകർത്തിരിക്കുകയാണ്.
കലാപം തുടങ്ങിയിട്ട് രണ്ടുമാസത്തോളമാകുന്നു. ഇതുവരെയായിട്ടും കലാപം അവസാനിപ്പിച്ച് പുർവ്വസ്ഥിതിയിൽ എത്തിക്കുന്നതിൽ മണിപ്പൂർ ഭരിക്കുന്ന ബിജെപി സർക്കാരിന് കഴിയാത്ത സാഹചര്യത്തിൽ സർക്കാർ രാജിവച്ച് ഒഴിയണമെന്നും സന്തോഷ് കുഴിവേലിൽ പ്രസ്താവനയിൽ ആവശ്യപ്പെട്ടു.
