പുതുതലമുറ സ്വാതന്ത്ര്യത്തിൻ്റെ മഹത്വം ഉൾക്കൊള്ളണം: മാണി സി കാപ്പൻ

പാലാ: സ്വാതന്ത്ര്യത്തിൻ്റെ മഹത്വം ഉൾക്കൊള്ളാൻ പുതുതലമുറ തയ്യാറാകണമെന്ന് മാണി സി കാപ്പൻ എംഎൽഎ പറഞ്ഞു. മഹാത്മാഗാന്ധി നാഷണൽ ഫൗണ്ടേഷൻ്റെ ആഭിമുഖ്യത്തിൽ ഗാന്ധി സ്ക്വയറിൽ സംഘടിപ്പിച്ച സ്വാതന്ത്ര്യദിനാഘോഷപരിപാടികൾ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 

ഇന്നത്തെ തലമുറയ്ക്കു സ്വാതന്ത്ര്യത്തിൻ്റെ വില മനസിലാക്കാൻ സാധിക്കുന്നുണ്ടോയെന്ന് സംശയമാണ്. രാജ്യത്തിൻ്റെ സ്വാതന്ത്ര്യത്തിനുവേണ്ടി ജീവൻ ബലിയർപ്പിച്ച മഹാന്മാരെ വിസ്മരിക്കരുതെന്നും മാണി സി കാപ്പൻ പറഞ്ഞു. 

രാജ്യാഭിമാനികളായി യുവജനങ്ങൾ വളരണമെന്നും തങ്ങളുടെ കർമ്മശേഷി രാജ്യപുരോഗതിക്കായി വിയോഗിക്കണമെന്നും എംഎൽഎ നിർദ്ദേശിച്ചു. ഫൗണ്ടേഷൻ ചെയർമാൻ എബി ജെ ജോസ് അധ്യക്ഷത വഹിച്ചു. പാലാ മുനിസിപ്പൽ ചെയർപേഴ്സൺ ജോസിൻ ബിനോ മുഖ്യ പ്രഭാഷണം നടത്തി. 

നഗരസഭാ കൗൺസിലർ ബിനു പുളിയ്ക്കക്കണ്ടം, ഫൗണ്ടേഷൻ ജനറൽ സെക്രട്ടറി സാംജി പഴേപറമ്പിൽ, കൊഴുവനാൽ ഗ്രാമ പഞ്ചായത്ത് വൈസ് പ്രസിഡൻ്റ് രാജേഷ് ബി, തങ്കച്ചൻ മുളകുന്നം, 

 

എം പി കൃഷ്ണൻനായർ, അഡ്വ സിബി മാത്യു തകിടിയേൽ, അക്സ ട്രീസ എന്നിവർ പ്രസംഗിച്ചു. മാണി സി കാപ്പൻ്റെ നേതൃത്വത്തിൽ ഗാന്ധിപ്രതിമയിൽ പുഷ്പാർച്ചനയും നടത്തി.