ഒച്ചുകളെക്കൊണ്ട് വലഞ്ഞ് ഭരണങ്ങാനം

representative image

ഭരണങ്ങാനം പഞ്ചായത്തിലെ മേരിഗിരി, തറപ്പേൽക്കടവ് ഭാഗങ്ങളിൽ ആഫ്രിക്കൻ ഒച്ചിന്റെ ശല്യം രൂക്ഷമായി. പുല്ലു മുതൽ തെങ്ങു വരെയുള്ളതെല്ലാം‍ ഇവ തിന്നു നശിപ്പിക്കുകയാണെന്നു നാട്ടുകാർ പറഞ്ഞു. 

കപ്പ, വാഴ, കമുക്, ചെടികൾ, പച്ചക്കറികൾ, ചേന, കപ്പളം, മുളക് തുടങ്ങിയവ ഇവ കാരണം നശിച്ചു. കമുക് ഉൾപ്പെടെയുള്ളവയുടെ ചുവട്ടിലെ തണ്ടും തിന്നുന്നുണ്ട്. തെങ്ങിന്റെ ഓലകളും കൂമ്പും നശിപ്പിക്കുന്നു.

മഴക്കാലം ആരംഭിച്ചതിനു ശേഷമാണ് ഇവയെ കണ്ടു തുടങ്ങിയത്. ഉപ്പ് വിതറുമ്പോൾ ചത്തുപോകുന്നുണ്ടെങ്കിലും ദിവസേന 5 പാക്കറ്റ് വരെ ഉപ്പുപൊടി വിതറിയാലും ഇവയുടെ ശല്യത്തിന് പൂർണമായി അറുതിയില്ല. 

ചെറിയത് മുതൽ വലിയ തവളയുടെ വലുപ്പം വരെയുള്ള ഒച്ചുകളുണ്ട്. ഇവയെനശിപ്പിക്കുന്നതിന് ആരോഗ്യ, കൃഷി  വകുപ്പുകളും വനം അധികൃതരും അടിയന്തര നടപടി സ്വീകരിക്കണമെന്നു പഞ്ചായത്തംഗം റജി വടക്കേമേച്ചേരി ആവശ്യപ്പെട്ടു.