പ്രതീകാത്മക ചിത്രം
വൈക്കം അഷ്ടമി ഉത്സവത്തിരക്കിൽ ഉണ്ടാകുന്ന കുറ്റകൃത്യങ്ങൽ കണ്ടെത്താൻ 75 സിസിടിവി ക്യാമറകൾ സ്ഥാപിയ്ക്കും.മുൻകാലങ്ങളെ അപേക്ഷിച്ച് വൻതിരക്ക് അനുഭവപ്പെടാനുള്ള സാധ്യത കണക്കിലെടുത്ത് ക്ഷേത്രവും പരിസരവും പൂർണമായും ക്യാമറ നിരീക്ഷണത്തിലാക്കും.
ഇതിന്റെ ഭാഗമായി നഗരത്തിലെ പ്രവർത്തനരഹിതമായ സിസിടിവി ക്യാമറകൾ നന്നാക്കാൻ നടപടിയായതായി നഗരസഭാധ്യക്ഷ രാധിക ശ്യാം പറഞ്ഞു. റോട്ടറി ക്ലബ്ബിന്റെയും പൊതുജനങ്ങളുടെയും പങ്കാളിത്തത്തോടെ നഗരസഭയുടെ നേതൃത്വത്തിലാണ് തകരാറുകൾ പരിഹരിക്കുന്നത്.
2018ൽ സി.കെ.ആശ എംഎൽഎയുടെ ആസ്തിവികസന ഫണ്ടിൽ നിന്നു 42 ലക്ഷംരൂപ മുടക്കി നഗരത്തിന്റെ വിവിധ പ്രദേശങ്ങളിലായി 42 ക്യാമറകൾ സ്ഥാപിച്ചിരുന്നു. ഇതിൽ 21 ക്യാമറകൾ പ്രവർത്തനരഹിതമായിട്ട് ഒരു വർഷത്തിലേറെയായി.
നഗരത്തിലെ ക്യാമറ കൂടാതെ ക്ഷേത്ര മതിൽക്കെട്ടിന് ഉള്ളിൽ ദേവസ്വം അധികൃതരുടെ നേതൃത്വത്തിൽ 33 സിസിടിവി ക്യാമറയും സ്ഥാപിക്കും. ദേവസ്വം അഡ്മിനിസ്ട്രേറ്റീവ് ഓഫിസ് ഇതിന്റെ കൺട്രോൾ റൂമായി പ്രവർത്തിക്കും.
പൊലീസ് സ്റ്റേഷനിലാണ് നഗരത്തിലെ ക്യാമറകളുടെ കൺട്രോൾ റൂം പ്രവർത്തിക്കുന്നത്. വൈക്കത്തിന്റെ വിവിധ പ്രദേശങ്ങളിൽ നടക്കുന്ന കുറ്റകൃത്യങ്ങൾ കണ്ടെത്തുന്നതിനും മോഷണം, വാഹനാപകടം ഉൾപ്പെടെയുള്ള കേസുകളുടെ തെളിവുകൾ ശേഖരിക്കുന്നതിനും ക്യാമറയിൽ നിന്നുള്ള ദൃശ്യങ്ങൾ പൊലീസിന് ഏറെ പ്രയോജനം ചെയ്യും. കൂടാതെ അപകടം സംഭവിക്കുമ്പോൾ തന്നെ സ്ഥലത്ത് എത്താനും രക്ഷാപ്രവർത്തനം നടത്താനും സാധിക്കും.
