റേഷൻ വിതരണം പുന:സ്ഥാപിച്ചില്ലെങ്കിൽ പ്രക്ഷോഭം സംഘടിപ്പിക്കും: സജി മഞ്ഞക്കടമ്പിൽ

കോട്ടയം : സെർവർ തകരാറിനെ തുടർന്ന് സംസ്ഥാന വ്യാപകമായി റേഷൻ വിതരണം സ്തംഭിച്ചിരിക്കുന്നത്  സംസ്ഥാന സർക്കാരിന്റെ കെടുകാര്യസ്ഥതയുടെ തെളിവാണെന്ന് യുഡിഎഫ് കോട്ടയം ജില്ലാ ചെയർമാൻ സജി മഞ്ഞക്കടമ്പിൽ ആരോപിച്ചു.

വിലക്കയറ്റം കൊണ്ട് പൊറുതി മുട്ടിനിൽക്കുന്ന സാധാരണ ജനങ്ങൾ റേഷൻ മേഖല സ്തംഭിച്ചതോടുകൂടി പട്ടിണിയിലേക്ക് തള്ളിയിടപ്പെട്ടിരിക്കുകയാണെന്നും അദ്ദേഹം

പറഞ്ഞു.

അടിയന്തരമായി സർവ്വർ തകരാറ് പരിഹരിച്ച് റേഷൻ വിതരണം പുന:സ്ഥാപിക്കണമെന്നും അല്ലാത്തപക്ഷം ശക്തമായ പ്രക്ഷോഭ പരിപാടികൾക്ക് കേരള കോൺഗ്രസ് പാർട്ടിയും ഐക്യ ജനാധിപത്യ മുന്നണിയും നേതൃത്വം നൽകുമെന്നും സജി അറിയിച്ചു.

സർവ്വർ തകരാറിന്റെ ഉത്തരവാദിത്വം വ്യാപാരികളുടെ മേൽ കെട്ടിവെച്ച്  തടി തപ്പാനുള്ള സർക്കാർ നീക്കം വിലപ്പോകില്ലെന്നും സജി പറഞ്ഞു.