തിരുവനന്തപുരം നഗരത്തിലെ പൊതുഗതാഗതരംഗത്ത് ഘട്ടംഘട്ടമായി ഡീസല് ബസുകള് പിന്വലിച്ച് ഇ-ബസുകള് മാത്രമാക്കി മാറ്റുമെന്ന് മന്ത്രി എം.ബി.രാജേഷ്. മലിനീകരണം കുറയ്ക്കുകയാണ് ലക്ഷ്യമെന്ന് മന്ത്രി പറഞ്ഞു. നഗരത്തിലെ സര്വീസിനായി കോര്പ്പറേഷന്റെ സ്മാര്ട്സിറ്റി പദ്ധതിയിലുള്പ്പെടുത്തി 113 ഇലക്ട്രിക് ബസുകള്കൂടി വാങ്ങും.
ആദ്യഘട്ടമായി കെ.എസ്.ആര്.ടി.സി. സ്വിഫ്റ്റിനു വാങ്ങിനല്കുന്ന 60 ഇ-ബസുകളുടെ ഫ്ലാഗ്ഓഫ് ശനിയാഴ്ച വൈകീട്ട് 3.30-ന് ചാല ഗവണ്മെന്റ് മോഡല് ബോയ്സ് ഹയര്സെക്കന്ഡറി സ്കൂള് മൈതാനത്തു മുഖ്യമന്ത്രി പിണറായി വിജയന് ഫ്ളാഗ്ഓഫ് ചെയ്യും. ബാക്കി ബസുകള് ഒക്ടോബര് ആദ്യം സര്വീസ് തുടങ്ങുമെന്ന് എം.ബി.രാജേഷും മന്ത്രി ആന്റണി രാജുവും പത്രസമ്മേളനത്തില് അറിയിച്ചു.
104 കോടി രൂപയ്ക്കാണ് 113 ഇ-ബസുകള് വാങ്ങുന്നത്. നിലവില് 50 ഇ-ബസുകള് തിരുവനന്തപുരത്ത് സിറ്റി സര്വീസ് നടത്തുന്നത്. ബസുകളുടെ റൂട്ടുകള് പൊതുജനാഭിപ്രായംകൂടി പരിഗണിച്ചു തീരുമാനിക്കും. സിറ്റി സര്ക്കുലര് ബസുകളും പോയിന്റ് ടു പോയിന്റ് ബസുകളും ഇതിലുള്പ്പെടുമെന്നും മന്ത്രി ആന്റണി രാജു പറഞ്ഞു.
.jpg)
