തിരുവനന്തപുരം: മാധ്യമങ്ങളോടുള്ള മുഖ്യമന്ത്രിയുടെ പ്രതികരണത്തിൽ രൂക്ഷവിമർശനവുമായ് പ്രതിപക്ഷ നേതാവ് രമേശ് ചെന്നിത്തല. മാധ്യമങ്ങളോടുള്ള മുഖ്യമന്ത്രിയുടെ പ്രതികരണം സമനില തെറ്റിയ നിലയിലാണെന്നും, കൊറോണ പ്രതിരോധം എന്നത് ആറുമണിക്കത്തെ തള്ളൽ മാത്രമാണ് എന്ന നിലയിലേക്ക് കാര്യങ്ങൾ എത്തിയിരിക്കുന്നുവെന്നും ചെന്നിത്തല പറഞ്ഞു.
മുഖ്യമന്ത്രിയുടെ ഓഫീസുമായി വിവാദ സ്ത്രീക്ക് അതി ശക്തമായ ബന്ധമുണ്ടെന്നും ചെന്നിത്തല ആരോപിച്ചു. എന്നാൽ ഇതൊന്നും മാധ്യമങ്ങൾ റിപ്പോർട്ട് ചെയ്യാൻ പാടില്ലെന്ന നിലപാടിലാണ് മുഖ്യമന്ത്രിയെന്നും ചെന്നിത്തല വ്യക്തമാക്കി. മുൻ മുഖ്യമന്ത്രി ഉമ്മൻ ചാണ്ടി ആളുകളോട് മാന്യമായി പെരുമാറിയത് പിണറായി വിജയൻ കണ്ടു പഠിക്കേണ്ടതാണെന്നും ചെന്നിത്തല ഓർമിപ്പിച്ചു.
ജനാധിപത്യത്തിൽ ചോദ്യം ചെയ്യാൻ എല്ലാവർക്കും അവകാശമുണ്ട്. എന്നാൽ ഇവിടെ ചോദ്യം ചെയ്യുന്നവരുടെ വായടപ്പിക്കാനാണ് പിണറായിയുടെ ശ്രമം. ട്രംപും മോദിയും പിണറായിയുമെല്ലാം ഒരേ ശൈലിയിലുള്ള ആൾക്കാരാണെന്നും ചെന്നിത്തല പരിഹസിച്ചു. സ്പ്രിംഗ്ലർ മുതൽ പാവങ്ങൾക്ക് വീട് വച്ചുകൊടുക്കുന്ന പദ്ധതിയിൽ വരെ അഴിമതി നടക്കുമ്പോൾ അതൊന്നും പ്രതിപക്ഷം ചൂണ്ടിക്കാണിക്കരുത് മാധ്യമങ്ങൾ ചൂണ്ടിക്കാണിക്കരുത് എന്ന നിലപാടിലാണ് മുഖ്യമന്ത്രിയെന്നും ചെന്നിത്തല ആരോപിച്ചു.
