പൂഞ്ഞാർ: പ്രീ പ്രൈമറി കുട്ടികൾക്കും രക്ഷിതാക്കൾക്കുമായി സംസ്ഥാന തലത്തിൽ നടത്തിവരുന്ന വരയുത്സവം ഗവൺമെന്റ് എൽ.പി.എസ് പൂഞ്ഞാറിലെ കുട്ടികളും രക്ഷിതാക്കളും ചേർന്ന് ഉത്സവമാക്കി. കുത്തിവരയിൽ നിന്ന് തുടങ്ങി പ്രതീകാത്മക ചിത്രങ്ങൾ വരയ്ക്കുന്ന പ്രീ സ്കൂൾ കുട്ടികൾക്ക് നേടേണ്ട വികാസ മേഖലകളും ശേഷികളും ആർജ്ജിക്കുന്നതിനുവേണ്ടി പൊതുവിദ്യാഭ്യാസ വകുപ്പിന്റെ ആഭിമുഖ്യത്തിൽ സമഗ്രശിക്ഷാ കേരളം നടത്തുന്ന പത്ത് ഉത്സവങ്ങളിൽ രണ്ടാമത്തെ ഉത്സവമാണ് വരയുത്സവം.
വരകളിലൂടെയുള്ള പ്രീ പ്രൈമറി കുട്ടികളുടെ ആശയ രൂപീകരണമാണ് ഈ ഉത്സവം വിഭാവനം ചെയ്യുന്നത്. ഗവൺമെന്റ് എൽ.പി.എസ് പൂഞ്ഞാറിലെ വരയുത്സവത്തിൽ കുട്ടികൾക്കൊപ്പം അവരുടെ മാതാപിതാക്കളും വളരെ ആസ്വദിച്ചാണ് പങ്കെടുത്തത്. കുഞ്ഞു ഭാവനകൾ വരയിലൂടെ തങ്ങളുടെ മനസ്സിലെ ആശയം അവതരിപ്പിച്ചപ്പോൾ കണ്ടു നിന്നവർക്കും കൗതുകമായി.
മാതാപിതാക്കളുടെയും കുട്ടികളുടെയും ഒപ്പം അധ്യാപകരും കൂടി വരയ്ക്കാൻ തുടങ്ങിയതോടെ വരയുത്സവം ശെരിക്കും ഒരുത്സവമായിമാറി. വരയുത്സവത്തിന്റെ ഉദ്ഘാടനം പിടിഎ പ്രസിഡന്റ് രഞ്ജിത് കുഞ്ഞുമോൻ നിർവ്വഹിച്ചു. ഹെഡ് മിസ്ട്രസ് സജിമോൾ എൻ.കെ, അധ്യാപകർ എന്നിവർ പരിപാടികൾക്ക് നേതൃത്വം നൽകി.
