ഭരണങ്ങാനം: കോട്ടയം ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി ജില്ലാ പഞ്ചായത്ത് മെമ്പർ രാജേഷ് വാളിപ്ലാക്കൽ അനുവദിച്ച ഫണ്ട് ഉപയോഗിച്ച് ഭരണങ്ങാനം ഡിവിഷനിലെ മുഴുവൻ അങ്കണവാടികളിലും ബയോ കമ്പോസ്റ്റർ ബിൻ നൽകുന്നു. ഉറവിട മാലിന്യ സംസ്കരണത്തിനായുള്ള ഉപകരണമാണ് ബയോ കമ്പോസ്റ്റർ ബിൻ. ഭരണങ്ങാനം, കടനാട്, കരൂർ, മീനച്ചിൽ എന്നീ നാല് പഞ്ചായത്തുകളാണ് ഭരണങ്ങാനം ഡിവിഷനിൽ ഉള്ളത്. ഇതിൽ കരൂർ പഞ്ചായത്തിലെ അങ്കണവാടികളിൽ നേരത്തെ ബിൻ നൽകിയിരുന്നു.
ബുധനാഴ്ച വൈകുന്നേരം നാല് മണിക്ക് ളാലം ബ്ലോക്ക് പഞ്ചായത്ത് ഓഡിറ്റോറിയത്തിൽ ചേരുന്ന യോഗം ജില്ലാ കളക്ടർ ജോൺ വി സാമുവൽ ഐ.എ.എസ് ഉദ്ഘാടനം ചെയ്യും. ജില്ലാ പഞ്ചായത്ത് മെമ്പർ രാജേഷ് വാളിപ്ലാക്കൽ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡൻറ് ജെസി ജോർജ് മുഖ്യപ്രഭാഷണം നടത്തും.
പഞ്ചായത്ത് പ്രസിഡണ്ടുമാരായ ബീന ടോമി, അനസ്യ രാമൻ, സോജൻ തൊടുക, ജിജി തമ്പി, ജില്ല വനിത ശിശു വികസന ഓഫീസർ ടിജു റേച്ചൽ തോമസ്, ചൈൽഡ് ഡെവലപ്മെൻറ് പ്രോജക്ട് ഓഫീസർ ജിനു മേരി ബെഞ്ചമിൻ തുടങ്ങിയവർ പ്രസംഗിക്കും. ഉറവിട മാലിന്യ സംസ്കരണത്തിനായി ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി ഭരണങ്ങാനം, കടനാട്, മീനച്ചിൽ പഞ്ചായത്തുകളിലെ 485 വീടുകളിൽ ജീബിന്നും, റിംഗ് കമ്പോസ്റ്റും നൽകിയിരുന്നു. ഭരണങ്ങാനം ഡിവിഷനിൽ മാലിന്യ സംസ്കരണത്തിനും, ശുചിത്വ പദ്ധതികൾക്കുമായി ഒരു കോടി പത്ത് ലക്ഷം രൂപയുടെ പദ്ധതികൾ നടപ്പിലാക്കിയതായി ജില്ലാ പഞ്ചായത്ത് മെമ്പർ രാജേഷ് വാളിപ്ലാക്കൽ പറഞ്ഞു.
