പാലാ: ഇക്കഴിഞ്ഞ ദിവസം ഉണ്ടായ ഇടിമിന്നൽ ഏറ്റ് തകർന്ന പാലാ രൂപതയിലെ വള്ളിച്ചിറ പൈങ്ങുളം സെ.മേരീസ് പള്ളിയുടെ മുൻഭാഗം പുനർനിർമ്മിക്കുവാൻ ഉടൻ നടപടി സ്വീകരിക്കുമെന്ന് വികാരി ഫാ.മാത്യു വെട്ടുകല്ലേലും ട്രസ്റ്റി സിബി വള്ളോനിയും പറഞ്ഞു.
1945-ൽ പണിത നിലവിലെ പള്ളിയുടെ കരിങ്കല്ലിൽ നിർമ്മിച്ച മുഖവാരത്തിൻ്റെ മുകൾ ഭാഗമാണ് ഇടിമിന്നലേറ്റ് തകർന്നത്. പള്ളിയുടെ മുൻഭാഗത്തെ പ്രവേശന വാതിലിനു മുകൾ ഭാഗ മേൽക്കൂരയിലെ ഓടുകളും വ്യാപകമായി തകർന്നിട്ടുണ്ട്. മിന്നലിനെ തുടർന്ന് കെട്ടിട ഭാഗങ്ങൾ ചിന്നിച്ചിതറി പള്ളിവക സമീപ കെട്ടിടങ്ങളിലേക്കും പതിച്ചു.
പെയ്തിറങ്ങിയ അതിതീവ്ര മഴയിൽ പള്ളിയുടെ ഉൾവശത്ത് മഴവെള്ളം കെട്ടി നിന്നു.കയർ കാർപ്പെററുകളും ബഞ്ചുകളും മഴവെള്ളത്തിൽ കുതിർന്നു. പള്ളിയുടെ വൈദ്യുതീകരണത്തിനും തകരാർ ഉണ്ടായി. അൽത്താരയ്ക്കും മററുഭാഗങ്ങൾക്കും തകരാർ ഇല്ലാത്തതിനാൽ ആരാധനങ്ങൾക്ക് മുടക്കം ഉണ്ടാവില്ല എന്ന് വികാരി അറിയിച്ചു.
പാലാ ബിഷപ്പ് മാർ ജോസഫ് കല്ലറങ്ങാട്ട് പള്ളി സന്ദർശിച്ച് അധികൃതരുമായി ചർച്ച നടത്തി. തകർന്ന ഭാഗങ്ങൾ പുനർനിർമ്മിക്കുന്നതിന് നിർദ്ദേശം നൽകി. കത്തീന്ദ്രൽ പള്ളി വികാരി ഫാ.ജോസ് കാക്കല്ലിലും എത്തിയിരുന്നു. നിരവധി വൈദികരും വിവിധ സംഘടനാ നേതാക്കളും ജനപ്രതിനിധികളും ഇടവക സമൂഹവും പള്ളിയിൽ എത്തി.
