കോട്ടയം: തെരുവുനായയുടെ ആക്രമണത്തിൽ ഏഴ് പേർക്ക് പരിക്കേറ്റു. തലയോലപ്പറമ്പിലാണ് ഏഴ് പേർക്ക് നായയുടെ കടിയേറ്റത്. പേവിഷബാധ സംശയിക്കുന്ന നായ പിന്നീട് വണ്ടിയിടിച്ച് ചത്തു.
തലയോലപ്പറമ്പ് മാർക്കറ്റ് ഭാഗത്ത് വെച്ച് വ്യാഴാഴ്ച രാവിലെയാണ് നായയുടെ ആക്രമണം. റോഡിന് സമീപത്തുള്ള വീട്ടിലെ ആളുകളെ വരെ നായ കടിച്ചു എന്നാണ് നാട്ടുകാർ പറയുന്നത്. ഒരാൾക്ക് മുഖത്താണ് കടിയേറ്റത്.
മറ്റൊരാൾക്ക് വയറിനും പരിക്കേറ്റു. മറ്റുള്ളവരുടെ കൈയ്ക്കും കാലിനുമാണ് കടിയേറ്റത്. പെവിഷബാധയുള്ള നായ നിരവധി വളർത്തുനായ്ക്കളേയും കടിച്ചു. ആക്രമണത്തിന് പിന്നാലെ നാട്ടുകാർ നായയെ ഓടിക്കാൻ ശ്രമിച്ചു. അതിനിടെയാണ് വണ്ടിയിടിച്ച് നായ ചത്തത്.
