പാലാ: പുലിയന്നൂർ ഗവൺമെൻ്റ് സ്കൂളിൽ സംഘടിപ്പിച്ച പാലാ വിദ്യാഭ്യാസ ഉപജില്ലാ പ്രവേശനോത്സവം കുട്ടികളിൽ ആകാംക്ഷയും അത്ഭുതവും പകർന്നു.
മുഖ്യതിഥിയായി പങ്കെടുത്തത് പാലാ എം എൽ എ മാണി സി കാപ്പനായിരുന്നു. കാപ്പൻ സ്കൂളിൽ എത്തിയപ്പോൾ കുട്ടികളുടെ മനസിൽ നിറഞ്ഞത് സിനിമാതാരത്തെ കണ്ട അനുഭവമായിരുന്നു. ടിവിയിലും മറ്റും കണ്ട എം എൽ എ ആയ താരത്തെ നേരിൽ കണ്ടപ്പോൾ കുട്ടികളിൽ ആശ്ചര്യം.
പുതിയ കുരുന്നുകളെ പെൻസിലിൻ്റെ വലിയ രൂപവും ബലൂണുകളും നൽകിയാണ് മാണി സി കാപ്പൻ, മുത്തോലി പഞ്ചായത്ത് പ്രസിഡൻ്റ് രഞ്ജിത്ത് ജി മീനാഭവൻ, മെമ്പർമാരായ രാജൻ മുണ്ടമറ്റം, ആര്യ സബിൻ എന്നിവർ സ്വീകരിച്ചത്.
പ്രവേശനോത്സവം മാണി സി കാപ്പൻ എം എൽ എ ഉദ്ഘാടനം ചെയ്തു. പഞ്ചായത്ത് പ്രസിഡൻ്റ് രഞ്ജിത്ത് ജി മീനാഭവൻ അധ്യക്ഷത വഹിച്ചു. പാലാ എ ഇ ഒ ശ്രീകല, ബി പി ഒ രാജ്കുമാർ, മെമ്പർമാരായ ആര്യാ സബിൻ, രാജൻ മുണ്ടമറ്റം എന്നിവർ പ്രസംഗിച്ചു.
ഹെഡ്മിസ്ട്രസ് ആശാ ബാലകൃഷ്ണൻ, അധ്യാപകരായ നീതു എസ് മറ്റം, അനിൽ എബ്രാഹം, അനീഷ ഗ്രേസ് ജോണി, പി ടി എ ഭാരവാഹികളായ പ്രസാദ്, രാഖിമോൾ രാജപ്പൻ എന്നിവർ നേതൃത്വം നൽകി. വർണ്ണാഭമായി അലങ്കരിച്ച സ്കൂൾ അങ്കണം വിദ്യാർത്ഥികൾക്ക് നവ്യാനുഭവം പകർന്നു.
