പാലാ: ലോക പരിസ്ഥിതി ദിനത്തോട് അനുബന്ധിച്ച് പാലാ സെന്റ് തോമസ് കോളേജിലെ എൻ.സി.സി നാവിക വിഭാഗം കേഡറ്റുകൾ പാലാ നഗരസഭയിലെ 19ാം വാർഡുമായി സഹകരിച്ചു കൊണ്ട് മാങ്കൂട്ടം കടവിന്റെ ശുചീകരണ യജ്ഞത്തിൽ പങ്കാളികളായി. പാലാ കത്തീഡ്രൽ പള്ളിക്കു സമീപം 1970-ൽ സ്ഥാപിതമായ മാങ്കൂട്ടം കടവിൽ 05-06-2023 തിങ്കളാഴ്ച രാവിലെ 8 മണിക്ക് ശുചീകരണ പ്രവർത്തനങ്ങൾ ആരംഭിച്ചു.
പ്രകൃതിക്കും മനുഷ്യനും മറ്റു ജീവജാലങ്ങൾക്കു ദോഷമുണ്ടാക്കുന്ന വിധം പ്ലാസ്റ്റിക് മാലിന്യങ്ങൾ, പൊട്ടിയ ചില്ലുകുപ്പികൾ മുതലായ മാലിന്യങ്ങൾ സി.റ്റി.ഒ. ഡോ. അനീഷ് സിറിയക്കിന്റെ നേതൃത്വത്തിൽ നാവിക വിഭാഗം കേഡറ്റുകൾ ശേഖരിച്ച് നഗരസഭയ്ക്ക് കൈമാറി.
കാടുപിടിച്ചു കിടന്നിരുന്ന കടവ് 10 മണിയോടുകുടി പരിസരവാസികൾക്കും നാട്ടുകാർക്കും പൊതുജനത്തിനും സുരക്ഷിതമായി ഉപയോഗിക്കാൻ കഴിയുന്ന രീതിയിൽ കേഡറ്റുകൾ വൃത്തിയാക്കി.
എൻ.സി.സി നാവിക വിഭാഗം കേഡറ്റുകളുടെ ഈ ശുചീകരണ യജ്ഞം പാലാ നഗരസഭാ 19ാം വാർഡ് കൗൺസിലർ മായാ രാഹുൽ ഉദ്ഘാടനം ചെയ്ത് സന്ദേശം നൽകി. കൗൺസിലർ മായാ രാഹുൽ, മാധ്യമ പ്രവർത്തകൻ തങ്കച്ചൻ, നാട്ടുകാരനായ പാലാത്ത് അച്ഛൻ എന്നറിയപ്പെടുന്ന ജോയി ജോർജ്ജ് തുടങ്ങിയവർ നാവിക വിഭാഗം വിദ്യാർത്ഥികളെ അഭിനന്ദിച്ചു.
എൻ.സി.സി. നാവിക വിഭാഗം സി.റ്റി.ഒ ഡോ അനീഷ് സിറിയക്, കേഡറ്റ് ക്യാപ്റ്റൻ ജോ ജെ ജോസഫ്, പി.ഒ.സിമാരായ അഭിഷേക് അനന്തകൃഷണൻ, ശരത് തുടങ്ങിയവർ ശുചീകരണ പ്രവർത്തനങ്ങൾക്ക് നേതൃത്വം നൽകി.
