പാലാ: കേരള രാഷ്ട്രീയ മണ്ഡലത്തിലും പൊതുപ്രവർത്തന മേഖലയിലും വ്യക്തിമുദ്ര പതിപ്പിച്ച് അകാലത്തിൽ കടന്നുപോയ അഡ്വ. ടി വി അബ്രാഹമിന്റെ പത്താം ചരമ വാർഷികം അഡ്വ.ടി വി അബ്രാഹം ഫൗണ്ടേഷന്റെ ആഭിമുഖ്യത്തിൽ ജൂൺ 12 തിങ്കളാഴ്ച കൊഴുവനാലിൽ വച്ച് ആചരിക്കുന്നു.
ഉച്ചകഴിഞ്ഞ് 2.30ന് പള്ളിയിലെ തിരുക്കർമ്മങ്ങളും കബറിടത്തിങ്കൽ പ്രാർത്ഥനയ്ക്കും ശേഷം 4 മണിക്ക് പാരീഷ് ഹാളിൽ അനുസ്മരണ സമ്മേളനവും വിദ്യാഭ്യാസ അവാർഡു വിതരണവും ജീവകാരുണ്യ ഫണ്ട് വിതരണവും പഠനോപകരണ വിതരണവും നടക്കും.
ചടങ്ങിൽ തകഴി സാഹിത്യ വേദിയുടെ നോവൽ പുരസ്കാരം നേടിയ ജോസ് മംഗലശ്ശേരിയെ ആദരിക്കുകയും ചെയ്യുന്നതാണെന്ന് ഫൗണ്ടേഷൻ വൈസ് പ്രസിഡന്റ് അഡ്വ. ഫ്രാൻസിസ് തോമസും സെക്രട്ടറി ഷിബു തെക്കേമറ്റവും പത്രസമ്മേളനത്തിൽ അറിയിച്ചു. മുൻ മന്ത്രി പി ജെ ജോസഫിന്റെ അദ്ധ്യക്ഷതയിൽ ചേരുന്ന അനുസ്മരണ സമ്മേളനം പ്രതിപക്ഷ നേതാവ് വി ഡി സതീശൻ ഉദ്ഘാടനം ചെയ്യും.
ജോസ് കെ മാണി എം പി മുഖ്യപ്രഭാഷണവും ഗവ.ചീഫ് വിപ്പ് ഡോ എൻ ജയരാജ് ജീവകാരുണ്യ ഫണ്ട് വിതരണവും തോമസ് ചാഴികാടൻ എം പി പഠനോപകരണ വിതരണവും മുൻ മന്ത്രി തിരുവഞ്ചൂർ രാധാകൃഷ്ണൻ എം എൽ എ പുരസ്കാര ജേതാവിനെ ആദരിക്കലും മാണി സി കാപ്പൻ എം എൽ എ യും മോൻസ് ജോസഫ് എംഎൽഎയും വിദ്യാഭ്യാസ അവാർഡു വിതരണവും നടത്തും.
മുൻ എംപിമാരായ പി സി തോമസ്, ഫ്രാൻസിസ് ജോർജ്, അഡ്വ. ജോയി എബ്രാഹം, ടെൽക്കാ ചെയർമാൻ പി സി ജോസഫ്, മെറ്റൽ ഇൻഡസ്ട്രീസ് ചെയർമാൻ അഡ്വ ഫ്രാൻസിസ് തോമസ്, ട്രിവാൻഡ്രം സ്പിന്നിംഗ് മിൽ ചെയർമാൻ സണ്ണി തോമസ്, ഫൗണ്ടേഷൻ മാനേജിംഗ് ട്രസ്റ്റി പ്രഫ. കൊച്ചുത്രേസ്യാ എബ്രാഹം, അഡ്വ ഫീൽസൺ മാത്യു, ആർ റ്റി മധുസൂദനൻ, അഡ്വ.തോമസ് വി റ്റി, ബാബു കെ ജോർജ്, അഡ്വ. ബിജു പുന്ന ത്താനം, നിമ്മി ട്വിങ്കിൾരാജ്, ബിജു വാതല്ലൂർ, ഷിബു തെക്കേമറ്റം, നോബി അബ്രാഹം എന്നിവർ അനുസ്മരണ പ്രസംഗവും നടത്തുന്നതാണ്.
കൊഴുവനാൽ കൈപ്പൻപ്ലാക്കൽ പരേതനായ വർക്കിയുടേയും റോസമ്മയുടേയും നാലാമത്തെ പുത്രനായിരുന്നു അഡ്വ ടി വി അബ്രാഹം. കേരളാ കോൺഗ്രസ്സ് സംസ്ഥാന ജനറൽ സെക്രട്ടറി, ഉന്നതാധികാര സമിതി അംഗം റബ്ബർ ബോർഡ് ഡയറക്ടർ ബോർഡ് അംഗം, കുറവിലങ്ങാട് ഗെയ്കോ ഇൻഡസ്ട്രീയൽ കോപ്പറേറ്റീവ് സൊസൈറ്റി പ്രസിഡന്റ്, കൊഴുവനാൽ സർവ്വീസ് സഹകര ബാങ്ക് ഡയറക്ടർ ബോർഡ് അംഗം, കൊഴുവനാൽ ലയൺസ് ക്ലബ്ബ് പ്രസിഡന്റ് എന്നീ സ്ഥാനങ്ങളിൽ പ്രവർത്തിച്ചു കൊണ്ടിരിക്കെയാണ് അദ്ദേഹത്തിന്റെ വേർപാട്. കൂടാതെ നിരവധി ട്രേഡ് യൂണിയനുകളുടെയും സർവ്വീസ് സംഘടനകളുടെയും പ്രസിഡന്റും ആയിരുന്നു അദ്ദേഹം.
കോട്ടയം ജില്ലയുടെ പ്രഥമ ജില്ലാ കൗൺസിൽ പ്രസിസന്റ്, ജില്ലാ കൗൺസിൽ പ്രസിഡന്റുമാരുടെ ചേംബറിന്റെ സെക്രട്ടറി, ജില്ലാ വികസന സമിതി അംഗം, മെഡിക്കൽ കോളേജ് ഉപദേശക സമിതി അംഗം, കെ എസ് ആർടിസി ഉപദേശക സമിതി അംഗം, കെ റ്റി ഡി സി ഡയറക്ടർ ബോർഡ് അംഗം, കൊഴുവനാൽ ഗ്രാമപഞ്ചായത്ത് അംഗം, തുടങ്ങി വിവിധ സ്ഥാനങ്ങളും വഹിച്ചിട്ടുണ്ട്.
